रवि लामिछाने आज अदालतमा उपस्थित, आजै थुनामा पठाइने

काठमाडौं। राष्ट्रिय स्वतन्त्र पार्टीका सभापति रवि लामिछानेलाई आज रूपन्देही जिल्ला अदालतमा उपस्थित गराइँदैछ।

शुक्रबार काठमाडौंको हात्तीगौंडाबाट पक्राउ परेका लामिछानेलाई रूपन्देही ल्याइएपछि जिल्ला प्रहरी कार्यालयले उनलाई अदालतमा उपस्थित गराउने तयारी गरेको हो।

जिल्ला प्रहरी कार्यालय रूपन्देहीका सूचना अधिकारी, डिएसपी सुरज कार्कीका अनुसार, लामिछानेलाई कार्यालय समय सुरू भएपछि अदालतमा पेश गरिनेछ, र अदालतको प्रक्रिया पूरा गरेपछि आजै थुनामा पठाइने जानकारी दिएका छन्।

सुप्रिम सहकारी ठगी तथा संगठित अपराध मुद्दामा जिल्ला अदालत रूपन्देहीले लामिछानेलाई एक करोड धरौटीमा छाड्ने आदेश दिएको थियो। तर सो आदेशलाई उच्च अदालत तुलसीपुरको बुटवल इजलासले उल्ट्याउँदै थुनामा पठाउन आदेश दिएको हो।

उक्त आदेशपछि शुक्रबार नै प्रहरीले लामिछानेलाई पक्राउ गरी रूपन्देही पठाएको थियो। लामिछानेले अदालतमा साधारण तारेखमा रिहा हुने माग गरेका थिए, तर अदालतले गम्भीर अपराधको आशंका गर्दै थुनामै पठाउनुपर्ने ठहर गरेको हो।