यस्ता छन, स्तन क्यान्सरका लक्षण र बच्ने उपाय

चिकित्सकहरूका अनुसार स्तन क्यान्सरको प्रारम्भिक पहिचान गरिएमा यसको उपचार सम्भव छ। यस रोगका लक्षणहरू प्रस्ट भए पनि कतिपय अवस्थामा प्रारम्भिक चरणमा कुनै विशेष संकेत देखिँदैन।

स्तन क्यान्सरका लक्षणहरू

स्तनमा गिर्खा वा गाँठो देखिनु स्तन क्यान्सरको प्रमुख संकेत हो। कतिपय अवस्थामा यी गाँठाहरू दुख्ने हुँदैनन्, जसका कारण धेरै महिलाले ध्यान नदिने सम्भावना रहन्छ। त्यस्तै, स्तनमा असामान्य परिवर्तन देखिनु, स्तन सुन्निनु, छालामा निको नहुने घाउ आउनु वा स्तनको मुन्टाबाट रगत वा पीप बग्नु पनि क्यान्सरको लक्षण हुन सक्छ।

कसरी बच्ने यस्ता छन उपाय 

स्वास्थ्य विशेषज्ञहरूका अनुसार स्तन क्यान्सरको जोखिम कम गर्न केही सावधानीहरू अपनाउन सकिन्छ। स्तनको नियमित परीक्षण गर्नाले प्रारम्भिक चरणमै रोग पहिचान गर्न सकिन्छ, जसले उपचार प्रभावकारी बनाउँछ। साथै, सन्तुलित आहार, नियमित व्यायाम, तौल नियन्त्रण, मद्यपान तथा धूम्रपानबाट टाढा रहनु जस्ता उपायहरूले पनि स्तन क्यान्सरको जोखिम कम गर्न मद्दत पुर्याउँछ।

चिकित्सकहरूका अनुसार स्तन क्यान्सरबारे सचेतना फैलाउनु र महिलाहरूलाई समयमै जाँच गर्न प्रेरित गर्नु रोग नियन्त्रणका लागि प्रभावकारी उपाय हो।