सनराइजर्सविरुद्ध लखनउको शानदार जित

काठमाडौं – इन्डियन प्रिमियर लिग (आईपीएल) अन्तर्गत गएराति भएको खेलमा लखनउ सुपर जायन्ट्सले सनराइजर्स हैदरावादलाई पाँच विकेटले पराजित गरेको छ। टस जितेर फिल्डिङ रोजेको लखनउले हैदरावादलाई ९ विकेट गुमाएर १९० रनमा सीमित गर्‍यो।

१९१ रनको लक्ष्य पछ्याउँदै लखनउले १६.१ ओभरमै ५ विकेट गुमाएर लक्ष्य पूरा गर्‍यो। निकोलस पुरनले विस्फोटक ७० रन बनाए भने मिचेल मार्शले ५२ रनको योगदान दिए। कप्तान ऋषभ पन्त १५ रनमा आउट भए।

हैदरावादका लागि ट्रेभिस हेडले सर्वाधिक ४७ रन बनाए। अंकत बर्माले १३ बलमा ३६ रन जोड्दा, नितिश रेड्डीले ३२ रन बनाए। लखनउका शार्दुल ठाकुरले घातक बलिङ गर्दै ४ विकेट लिए।

यो जितसँगै लखनउले दुई खेलबाट दुई अंक जोडेको छ भने हैदरावादको यो पहिलो हार हो।