उदयपुरमा बोलेरो ठक्कर: घरको पेटीमा बसेका दुई दिदीबहिनीको ज्यान, चालक पक्राउ

उदयपुरको त्रियुगा नगरपालिका–१२ डिएमगेटमा बोलेरो गाडीको ठक्करबाट दुई दिदीबहिनीको ज्यान गएको छ। गाईघाटस्थित हिमशिखर फर्निचरको प्र.नं. १०५ ००१ च ००९१ नम्बरको बोलेरो गाडी अनियन्त्रित भई घरको पेटीमा बसिरहेका दिदीबहिनीलाई ठक्कर दिँदा उनीहरूको घटनास्थलमै मृत्यु भएको प्रहरीले जनाएको छ।

त्रियुगा गाईघाट डिएमगेटबाट बसपार्कतर्फ जाँदै गरेको बोलेरो गाडीले बाटो काट्ने क्रममा नियन्त्रण गुमाउँदा घरको पेटीमा बसिरहेका दुई बालिकालाई ठक्कर दिएको थियो। उदयपुर प्रहरीका अनुसार सप्तरी जिल्ला राजविराज घर भई त्रियुगा नगरपालिका–१२ स्थित राजेन्द्र मैनालीको घरमा डेरा गरी बस्दै आएका ललन दासका १२ वर्षीय देवीकुमारी दास र १४ वर्षीय अनुकुमारी दासको घटनास्थलमै मृत्यु भएको हो।

  घटनामा संलग्न बोलेरो गाडीका चालक त्रियुगा नगरपालिका–९ गैरुन बस्ने १८ वर्षीय निर्जल कटुवाललाई प्रहरीले नियन्त्रणमा लिएको छ। प्रहरीका अनुसार घटना बारे थप अनुसन्धान भइरहेको छ।