टाइगर कप भलिबल प्रतियोगितामा गण्डकी प्रदेश पुलिससँग पराजित

एनसेल पाँचौँ टाइगर कप भलिबल प्रतियोगिताको पुरुषतर्फको दोस्रो खेलमा गण्डकी प्रदेश नेपाल पुलिस क्लबसँग पराजित भएको छ।

पोखरा रंगशालास्थित भलिबल कोर्टमा भर्खरै सकिएको खेलमा गण्डकी पुलिससँग ३–२ को सेटमा पराजित भयो।

पहिला दुई सेट गुमाएको गण्डकीले तेस्रो र चौथो सेटमा उत्कृष्ट पुनरागमन गरे पनि पाँचौँ सेटमा सम्हालिन नसक्दा खेल गुमाउनु पर्‍यो।

पुलिसले पहिलो सेट २५–२२ र दोस्रो सेट २५–२१ ले आफ्नो पक्षमा पारेको थियो। गण्डकीले तेस्रो सेट २५–१९ र चौथो सेट २५–१४ ले जितेको थियो।

पाँचौँ सेटमा गण्डकीले सुरुवाती अग्रता जोगाउन नसक्दा खेल १५–१० ले नतिजा गुमायो।

अब आजको अन्तिम खेल त्रिभुवन आर्मी क्लब र सशस्त्र प्रहरी बल एपिएफबिच हुनेछ। यसअघि पुरुषतर्फ भएको खेलमा भारतको सुनिल भलिबल क्लबले साबिक विजेता टिपटप हेल्प नेपाललाई ३–१ को सेटले पराजित गरेको थियो।

यस्तै आजै भएको पहिलो खेलमा महिलातर्फ आयोजक टोलीले त्रिभुवन आर्मी क्लबलाई ३–० को सोझो सेटमा पराजित गरेको थियो।