यु–१९ महिला विश्वकप क्रिकेट : स्कटल्याण्डसँग नेपाल पराजित

यु–१९ महिला विश्वकप क्रिकेटमा नेपालले लगातार दोस्रो हार ब्यहोरेको छ। मलेसियामा जारी आइसिसी यु–१९ महिला टी–२० विश्वकपमा नेपाल स्कटल्याण्डसँग १ विकेटले पराजित भएको हो।

यसअघि नेपाल पहिलो खेलमा बंगलादेशसँग ५ विकेटले पराजित भएको थियो। लगातार पराजयका कारण नेपालको ‘सुपर सिक्स’ प्रवेशको सम्भावना कमजोर बनेको छ।

आजको खेलमा टस जितेर ब्याटिङ रोजेको नेपालले १८ ओभर ५ बलमा सबै विकेट गुमाउँदै ७३ रनमै सीमित भयो। कप्तान पूजा महतोले सर्वाधिक २७ रन, सावित्री धामीले १० रन जोड्नु बाहेक अन्य ब्याटरले दोहोरो अंकमा रन जोड्न सकेनन्।

स्कटल्याण्डका लागि मैसी म्याकिराले ५, अमी बलडाइ र नइमा शेखले समान २–२ तथा क्रिस्टी म्यायाकोलले १ विकेट लिए।

स्कटल्याण्डले पाएको ७४ रनको लक्ष्य १८ ओभर ४ बल खेल्दै ९ विकेट गुमाएर पूरा गर्यो। स्कटल्याण्डका लागि पिप्पा स्प्रोलले ३५ रन जोडिन् । ग्रावियल फन्टेलाले १२ रन बनाइन् भने अन्य ब्याटरले दोहोरो अंकमा रन जोड्न सकेनन्।

नेपालका लागि रचना चौधरी र सिमाना केसीले समान २–२ तथा पूजा महतो र कृष्मा गुरुङले समान १–१ विकेट लिए।