दाङमा रुखबाट खसेर मृत्यु भएका भनिएकाे व्यक्तिको गोली लागेको प्रहरीको पुष्टि

दाङमा रुखबाट खसेर मृत्यु भएका भनिएका एक युवकको गोली लागेर मृत्यु भएको पुष्टि भएपछि २ जना पक्राउ परेका छन् पक्राउ पर्नेमा दंगीशरण गाउँपालिका–२ निवासी २२ वर्षका छविलाल डाँगी र सोही ठाउँ निवासी २७ वर्षका पुष्पलाल बस्नेत रहेका छन् । जिल्ला प्रहरी कार्यालय दाङले घोराहीमा पत्रकार सम्मेलनको आयोजना गरेर पक्राउ परेकाहरूलाई सार्वजनिक गरेको हो ।

माघ ३ गाउँकै राजाकोट सामुदायिक वनमा शिकार खेल्न गएका ३ मध्य दंगीशरण गाउँपालिका–२ कौवाघारी निवासी २५ वर्षका प्रेम बहादुर कुसारीको भरुवा बन्दुको छर्राले लागेर मृत्यु भएपछि प्रहरीले उनिहरुलाई पक्राउ गरेको हो । गएको बिहीबार रुखबाट खसेर घाइते भएको भन्दै राप्ती प्रादेशिक अस्पताल तुलसीपुरमा सामान्य उपचारपछि थप उपचारका लागि नर्सिङहोम नेपालगंज लगिएका कुसारीको उपचारको क्रममा सोहीदिन राति ८ बजे मृत्यु भएको थियो ।

घटना शङ्कास्पद रहेको सूचना पाएपछि जिल्ला प्रहरी कार्यालय दाङका डीएसपी अर्जुनप्रसाद तिमिल्सिनाको नेतृत्वमा शुक्रबार घरमैको पुगेको प्रहरीले मृतक कुसारीको शव नियन्त्रणमा लिएर पोष्टमार्टमका लागि नेपालगंज पठाएको थियो ।

पोष्टमार्टमका क्रममा मृतक कुसारीको खुट्टाको साँप्रा र शरीरका विभिन्न भागमा भरुवा बन्दुकका छर्रा फेला परेपछि प्रहरीले शिकार खेल्न गएका दुई जना साथी डाँगी र बस्नेतलाई पक्राउ गरेर अनुसन्धान थालेको हो । घटनाको विषयमा पक्राउ परेका दुबै जनाको कुरा बाझिएको भन्दै डीएसपी तिमिल्सिनाले विस्तृत अनुसन्धानपछि मात्रै वास्तविकता खुल्ने बताए ।