आइसिसी यू–१९ महिला विश्वकपमा नेपाल, अस्ट्रेलिया र बंगलादेश, स्कटल्यान्ड भिड्दै

पहिलोपटक आइसिसी यू–१९ महिला विश्वकप खेल्न लागेको नेपालले समूह ‘डी’मा अस्ट्रेलिया, बंगलादेश र स्कटल्यान्डविरुद्ध खेल्ने भएको छ । अन्तर्राष्ट्रिय क्रिकेट काउन्सिल (आइसिसी)का अनुसार ५ माघमा नेपालले आफ्नो पहिलो खेलमा बंगलादेशविरुद्ध प्रतिस्पर्धा गर्नेछ । मलेसियामा ५ माघबाट सुरु हुने विश्वकपमा नेपालले विश्व क्रिकेटकै अनुभवी राष्ट्र अस्ट्रेलिया र बंगलादेशसँगै स्कटल्यान्डसँगको प्रतिस्पर्धामा अन्तर्राष्ट्रिय एक्सपोजर मात्र नभएर गतिलो नतिजा निकाल्ने लक्ष्य राखेको छ । नेपालले ७ माघमा स्कटल्यान्डको सामना गर्नेछ ।

समूह चरणको अन्तिम खेल ९ माघमा नेपालले उपाधि दाबेदार अस्ट्रेलियाको सामना गर्ने आइसिसीले जनाएको छ । आइसिसीले मलेसियाको बांगी मैदानमा आयोजना गर्न लागेको विश्वकप दोस्रो संस्करण हो । पुरुष विश्वकप ९० को दशकबाट आइसिसीले सुरु गरेको थियो । आइसिसीले महिला खेलाडीलाई पनि उमेर समूहदेखि नै एक्सपोजर दिनुपर्ने जनाउँदै यू–१९ विश्वकप क्रिकेट प्रतियोगिता २०२३ देखि आयोजना गरेको हो । पहिलो संस्करणमा २० टोलीले प्रतिस्पर्धा गरेका थिए । दक्षिण अफ्रिकाको सेनवेस पार्कमा भएको फाइनलमा भारतले इंग्ल्यान्डमाथि सात विकेटको जित निकाली विश्वकप उपाधि उचाल्यो ।

दोस्रो संस्करणमा चार नयाँ राष्ट्र
आइसिसीले दोस्रो संस्करणमा थप चार कोटा थपेको छ । आयोजक राष्ट्रका रूपमा मलेसिया सुरुमै छनोट भयो । नेपाल, नाइजेरिया र सामोआले छनोट चरण पारी गरी विश्वकपमा स्थान बनाएका हुन्‌ ।

अन्तर्राष्ट्रिय क्रिकेट परिषद् (आइसिसी)को आयोजनामा आगामी ५ माघदेखि यू–१९ महिला विश्वकप हुन लागेको हो । २० माघसम्म सञ्चालन हुने विश्वकपको दोस्रो संस्करणमा नेपालसहित १६ देशले सहभागिता जनाउँदै छन्‌ । नेपालले गत नोभेम्बरमा युएईलाई एसिया कप छनोटको अन्तिम खेलमा चार विकेटले हराउँदै मलेसियामा आयोजना हुने विश्वकपमा स्थान सुरक्षित गरेको थियो । राउन्ड रोबिन लिगमा नेपालले सर्वाधिक अंक बटुलेको थियो ।

सुपर सिक्समा पुग्ने अवसर
आइसिसीले सहभागी १६ टोलीलाई चार समूहमा विभाजन गरेको छ । आइसिसीले ग्रुप १ को ‘ए’ र ‘डी’ समूहका शीर्ष तीन टोली सुपर सिक्समा पुग्ने जनाएको छ । नेपालले एक जित निकाल्दा पनि सुपर सिक्समा पुग्ने सम्भावना छ । सुपर सिक्सका दुवै ग्रुपका शीर्ष दुई टोली सेमिफाइनल पुग्नेछन्‌ । दुई सेमिफाइनलका विजेताबिच २० माघमा उपाधि भिडन्त हुनेछ ।

यस्ता छन् अनुभवी प्रतिस्पर्धी

बंगलादेश (खेल ५ माघमा)
बंगलादेशको यू–१९ महिला टोली निर्माण सन् २०२३ मा भएको थियो । टेस्ट राष्ट्र भएकाले बंगलादेशले लगातार दोस्रोपटक यू–१९ विश्वकपमा सहजै स्थान सुरक्षित गर्‍यो । गत संस्करणमा बंगलादेश सुपर सिक्ससम्म पुगेको थियो । यस टोलीले अहिलेसम्म १५ अन्तर्राष्ट्रिय खेल खेलेको छ । जसमा ११ जित र चार खेलमा हार सामना गरेको छ । बंगलादेशले श्रीलंकालाई चार र पाकिस्तानलाई दुईपटक हराएको छ । भारतसँग दुई खेलमा पराजित भएको बंगलादेशले श्रीलंका र दक्षिण अफ्रिकालाई नतिजा सुम्पिएको छ ।

स्कटल्यान्ड (खेल ७ माघमा)
युरोपियन छनोटबाट लगातार दोस्रोपटक स्कटल्यान्डले विश्वकपमा स्थान बनाएको हो । युरोपको छनोटमा स्कटल्यान्डले विश्वकपको टिकट पक्का गर्न नेदरल्यान्ड्समाथि ३–० को जित निकालेको थियो । गत संस्करणमा स्कटल्यान्ड पहिलो चरणबाटै बाहिरिएको थियो । यस महिला टोलीले अहिलेसम्म विश्वकपबाहेक चार अन्तर्राष्ट्रिय खेलमा एक जित मात्र हात पारेको छ । भारत र दक्षिण अफ्रिकासँग समान एक खेल खेल्दा स्कटल्यान्डले हारको सामना गरेको छ ।

अस्ट्रेलिया (खेल ९ माघमा)
सन् २००३ मा अस्ट्रेलियन क्रिकेट संघले महिलातर्फ उमेर समूहको विकास गर्ने गरी यू–१९ महिला टोली स्थापना गरेको थियो । टेस्ट राष्ट्र भएकाले अस्ट्रेलियाले आइसिसीबाट आयोजना गर्ने सबै किसिमका अन्तर्राष्ट्रिय खेलमा सहजै स्थान बनाएको छ । सन् २०२२ मा अस्ट्रेलियाले यू–१९ विश्वकपको पहिलो संस्करणमा भाग लिन साराह अलेयलाई कप्तानीको जिम्मेवारी दिएको थियो । दक्षिण अफ्रिकामा सम्पन्न भएको पहिलो संस्करणको सेमिफाइनलमा अस्ट्रेलिया इंग्ल्यान्डसँग ३ रनले स्तब्ध भएको थियो । यस टोलीले सन् २०२४ को वर्षमा ६ अन्तर्राष्ट्रिय खेलमा सहभागी हुँदा चारमा जित र दुईमा हारको सामना गरेको थियो । उमेर समूहको यस टोलीले अहिलेसम्म आइसिसीको पूर्णकालीन सदस्यमा बंगलादेश र इंग्ल्यान्डविरुद्धको समान एक खेल गुमाएको छ ।