मुगुको कार्मारोङमा अज्ञात रोगले पाँच दर्जन बढी याक र चौंरीको मृत्यु

मुगुको मुगुम कार्मारोङ गाउँपालिका- २ मुगु गाउँमा अज्ञात रोगले चौंरी तथा याकहरु मरेका छन । मुगु गाउँका स्थानीय छोर्तेन लामाका अनुसार सोमबारसम्म कम्तिमा ५०-६० वटा चौंरी र याक अज्ञात रोगले मरेका छन ।

सुरुमा पशुले मुखबाट र्‍याल निकाल्ने, हरियो रंगको पातलो दिशा गर्ने, दिशामा हल्का रगत देखिने र यी लक्षण देखिएको २४ घण्टाभित्र सो पशुको मृत्यु भइरहेको लामाले बताए।

अज्ञात रोगले चौंरी र याक प्रभावित भएको खबर पाउनासाथ गाउँपालिकाले औषधी र पशु स्वास्थ्यकर्मी पठाए पनि पालिकामा उपलब्ध जनशक्ती र औषधिको क्षमताले नभ्याउने गाउँपालिकाका प्रमुख प्रशासकीय अधिकृत सुवासचन्द्र रावलले बताए।

स्वाब संकलन गरी परीक्षणका लागि अन्यत्र पठाउनुपर्ने उल्लेख गर्दै उनले त्यसका लागि आवश्यक उपकरण र जनशक्ती गाउँपालिकामा नभएकाले बताए। गाउँपालिकाले जिल्ला भेटनरी तथा पशु अस्पताल गमगढी र प्रदेशलाई पत्र पठाउँदै सहयोग मागेको थियो।
पालिकाको पत्रपछि भेटनरी तथा पशु अस्पतालका चिकित्सकसहितको टोलि र पालिकाको आग्रहमा बुद्ध मावि मांग्रीमा पशु स्वास्थ्य प्राविधिक शिक्षा अध्यापन गराउने दुईजना पशु चिकित्सक उपचारका लागि गइसकेका रावलले जानकारी दिए।

उनका अनुसार मुगु गाउँमा चिसोका कारण स्थानीयहरु बेंसीतिर अस्थायी बसाइ सरेकाले गाउँमा कोहि नहुँदा चौरी रहेका लेखहरुमा पुग्न स्वास्थ्यकर्मीको टोलिलाइ कठिनाइ भैरहेको छ। त्यसैमा मंगलबारबाट हिमपात हुन थालेपछि झनै समस्या भएको छ।

चौंरी हिमालतिर रहेका र गाउँ नझरेकाले हिउँ पाटनहरुमा कति चौंरी र याक अज्ञात रोगबाट मरे भन्ने यकिन विवरण आइसकेको छैन। शनिबारसम्म ६० भन्दा बढी मरेको खबरको आधारमा अनुमान गर्ने हो भने आजसम्म १०० बढी चौरी तथा याकहरु उक्त अज्ञात रोगबाट मरिसकेको हुनसक्ने गाउँपालिकाका प्रमुख प्रशासकीय अधिकृत रावलले बताए।