छुरा प्रहार गरी १९ वर्षिया युवतीको हत्या, १ युवक पक्राउ

झापामा छुरा प्रहार गरी १९ वर्षिय युवतीको हत्या भएको छ । झापाको अर्जुनधारा-६ बिर्तामोडको महानन्द चोकमा एक युवाले छुरा प्रहार गरेर १९ वर्षिय युवतीको हत्या गरेका छन् ।

शुक्रबार साँझ ६ बजेको समयमा कैलाली गौरीगंगा नगरपालिका-३ का २० वर्षिय अनिल विकले इलाम सूर्योदय नगरपालिका-१० फिक्कलकी १९ वर्षिय मनिषा लोहारको हत्या गरेका हुन् । युवती मनिषा विर्तामोडमै बस्दै आएकी थिइन् । युवतीलाई धारिलो हतियार प्रहार गरेपछि गम्भीर घाइते बनेकी थिइन् । उनको उपचारकै क्रममा विएण्डसी अस्पताल बिर्तामोडमा मृत्यु भएको प्रहरीले जनाएको छ ।
यस अघि पनि ती युवतीलाई युवकले पटक पटक छुरा रोपेका थिए ।

कोशी प्रदेश प्रहरी कार्यालयले युवतीको राती ७ बजेर १० मिनेटमा मृत्यु भएको जनाएको छ । छुरा प्रहार गर्ने युवालाई गाउँलेले लखेटेर नियन्त्रणमा लिएका थिए । उनलाई पनि गाउँलेले कुटपिट गरेर घाइते बनाएका छन् ।

ती युवाको पनि विएण्डसी अस्पताल बिर्तामोडमा उपचार भइरहेको छ । घटना के कारणले भएको हो भन्ने बारेमा र युवकमाथि कुटपिट गर्ने समूहका बारेमा खोजी र अनुसन्धान भइरहेको प्रहरीले जनाएको छ ।

चार दिनअघि बिर्तामोडको किराँत चोकमा युवतीकै विषयलाई लिएर दुई समूहबिच ग्याङ फाइट भएको थियो । झडपमा एकजना घाइते भएका थिए भने तीनजनालाई प्रहरीले पक्राउ गरेको थियो ।
घटनाको बाँकि अनुसन्धान भइरहेको प्रदेश प्रहरीले जनाएको छ ।