राष्ट्रिय परीक्षा बोर्डको वेबसाइटमा अर्कै लिंक

राष्ट्रिय परीक्षा बोर्डको वेबसाइटमा समस्या आएको छ । वेबसाइटमा हाल लेखामान बोर्ड नामक चार्टर्ड एकाउन्टको लिंक खुलिरहेको छ । नेपाल सरकारबाट नेपाल चार्टर्ड एकाउन्टेन्ट्स ऐन, २०५३ बमोजिम गठित बोर्डको डिटेल बोर्डको वेबसाइटमा देखिन्छ ।

बोर्डका अध्यक्ष डा महाश्रम शर्माले अहिले वेबसाइटमा समस्या देखिएको बताए । सिंहदरबारमा रहेको एकीकृत डाटा व्यवस्थापन केन्द्र (राष्ट्रिय सूचना प्रविधि केन्द्र) मा समस्या आएपछि त्यसमार्फत सञ्चालनमा रहेको बोर्ड लगायत अन्य निकायहरूको वेबसाइटमा समस्या देखिएको उनको भनाइ छ ।

‘केन्द्रको डाटा सेन्टरमा समस्या देखिएको छ । जसले गर्दा त्यहाँबाट सञ्चालन हुने हाम्रो लगायत अन्य विभिन्न निकायको वेबसाइटमा समेत समस्या देखिएको छ । यो बनाउने काम भइरहेको छ,’ अध्यक्ष शर्माले भने ।
बोर्डको मुख्य वेबसाइटमा समस्या आएपछि अहिले समस्याको समाधानका लागि काम भइरहेको र केही दिनमा ठिक हुने छ ।