काठमाडौं, २०८२ कार्तिक १ — पाकिस्तानको आक्रमणमा अफगानिस्तानका तीन क्रिकेट खेलाडीको मृत्यु भएको छ। अफगानिस्तान क्रिकेट बोर्ड (एसीबी) का अनुसार पक्तिका प्रान्तमा भएको पाकिस्तानी आक्रमणमा कबीर, सिब्घतुल्लाह र हारुन नामका तीन खेलाडीले ज्यान गुमाएका छन्।

एसीबीले शुक्रबार साँझ भएको सो आक्रमणको निन्दा गर्दै आगामी नोभेम्बरमा पाकिस्तानसँग खेलिन लागेको त्रिकोणीय टी-२० सिरिजमा भाग नलिने निर्णय गरेको छ। बोर्डले सामाजिक सञ्जालमार्फत तीनै खेलाडीका तस्बिर सार्वजनिक गर्दै भनेको छ,

“यी खेलाडीहरूलाई पाकिस्तानबाट गरिएको लक्षित आक्रमणमा ज्यान गुमाउनुपर्‍यो। यो खेल र मानवताको विरोधमा गरिएको अमानवीय कार्य हो।”

बोर्डका अनुसार सो घटनामा खेलाडीहरूसहित अन्य पाँच जना सर्वसाधारणको पनि मृत्यु भएको छ।

एसीबीले जारी गरेको विज्ञप्तिमा भनिएको छ,

“हाम्रा प्रिय खेलाडीहरूप्रति सम्मानस्वरूप र यस दुखद घटनाप्रति विरोध जनाउँदै, अफगानिस्तान क्रिकेट बोर्डले पाकिस्तानसँग नोभेम्बरको अन्त्यमा हुने त्रिकोणीय टी-२० सिरिजबाट फिर्ता लिने निर्णय गरेको छ।”

उक्त सिरिज पाकिस्तान, अफगानिस्तान र श्रीलंकाबीच नोभेम्बर १७ देखि २९ सम्म लाहोर र रावलपिंडीमा आयोजना हुने तय भएको थियो।

यस घटनाबारे पाकिस्तान क्रिकेट बोर्ड (पीसीबी) ले अहिलेसम्म कुनै प्रतिक्रिया दिएको छैन।