पश्चिम सुर्खेतको ‘लाइफलाइन’ सडक अलपत्र: असारमा पनि काम नसकिने, ठेकेदारविरुद्ध जनप्रतिनिधि आक्रोशित

 सुर्खेत। ट्र्याक खुलेको २९ वर्ष बितिसक्दा पनि पश्चिम सुर्खेतको ‘लाइफलाइन’ मानिने बराहतालको बड्डीचौरदेखि पञ्चपुरीको खम्बागाडेसम्मको सडक निर्माणले पूर्णता पाउन सकेको छैन। २०७९ सालमा ४२ करोड ४७ लाख रुपैयाँमा ठेक्का सम्झौता भई पटक–पटक म्याद थपिएर यो वर्षको असार मसान्तसम्म पुर्‍याइए पनि तोकिएको समयमा काम सकिने कुनै छाँटकाँट छैन।

पूर्वाधार विकास निर्देशनालयका प्रमुख सूर्य शाहीका अनुसार हालसम्म सडकको भौतिक प्रगति जम्मा ४० प्रतिशत मात्र पुगेको छ। तर, फिल्डमै पुगेर हेर्दा निर्माणस्थलमा न पर्याप्त कामदार छन्, न त मेसिन उपकरण नै। उल्टै निर्माण कम्पनी ‘अनक जयदेवी जेभी’ले गैरजिम्मेवारपूर्ण जवाफ दिँदै पन्छिने गरेको छ। ठेकेदारको चरम लापरबाहीले सीमा नाघेपछि अनुगमनमा पुगेका सरोकारवाला र स्थानीय जनप्रतिनिधिले तत्काल तीव्र गतिमा काम अघि बढाउन कडा चेतावनी दिएका छन्।

पञ्चपुरी नगरपालिकाका मेयर लालवीर भण्डारीले निर्माण व्यवसायीको बदमासीका कारण आफूहरूले जनताको गाली खानुपरेको गुनासो पोखे। त्यसैगरी, चौकुने गाउँपालिकाका अध्यक्ष खड्ग विवस बासपानेले ठेकेदारको ढिलासुस्तीले जनताले सास्ती पाएको भन्दै यसको क्षतिपूर्ति निर्माण व्यवसायीले नै दिनुपर्ने माग गरे।

सडकको दुर्दशाका कारण आफ्ना नागरिकले बेस्सरी सास्ती भोग्नुपरेको बराहताल गाउँपालिका उपाध्यक्ष लक्ष्मी पुनले बताइन्। अनुगमनकै क्रममा जिल्ला समन्वय समितिका प्रमुख गंगाराम तिमिल्सेनाले निर्माण व्यवसायीलाई गम्भीर हुन आग्रह गर्दै भने, “तपाईंहरूले जानकारी गराएको खण्डमा हरेक अप्ठ्याराहरूलाई हामी सहजीकरण गरिदिन्छौं, तर तत्काल निर्माण कार्य थाल्नुस्।” हिउँदमा धुलो र बर्खामा हिलोका कारण एम्बुलेन्स समेत चल्न नसक्ने यस सडकमा बेवास्ता गरिए कडा कदम चाल्ने चेतावनी सरोकारवालाहरूले दिएका छन्।