प्रतिशोधको राजनीति विरुद्ध एमालेको ‘शंखघोष’: अध्यक्ष ओलीको गिरफ्तारीपछि देशभर आन्दोलनको तयारी

काठमाडौँ । प्रमुख प्रतिपक्षी दल नेकपा (एमाले) ले सरकारले राजनीतिक प्रतिशोध साँधेको आरोप लगाउँदै देशव्यापी आन्दोलनको तयारी सुरु गरेको छ। एमाले अध्यक्ष केपी शर्मा ओली र पूर्व गृहमन्त्री रमेश लेखकको गिरफ्तारीलाई ‘लोकतन्त्रमाथिको प्रहार’ ठहर गर्दै एमालेले प्रतिरोधको नीति लिने संकेत दिएको हो।

नेता महेश बस्नेतले सामाजिक सञ्जालमार्फत सार्वजनिक गर्नुभएको सन्देशमा वर्तमान सरकारले अराजकतालाई प्रश्रय दिएको र अनुभवी नेताहरूलाई निशाना बनाएको दाबी गर्नुभएको छ।

‘बालेन सरकार’ माथि गम्भीर आरोप
एमाले नेता बस्नेतले वर्तमान सत्ता समीकरण र विशेषगरी बालेन शाहको नेतृत्वदायी भूमिका रहेको भनिएको सरकारको कडा आलोचना गर्नुभएको छ। उहाँले सुधन उरुङ्गजस्ता ‘अनुभवहीन र विवादित’ व्यक्तिलाई गृहमन्त्री बनाइनुले देशमा द्वन्द्व निम्त्याउने तर्क गर्नुभएको छ।

बस्नेतले लेख्नुभएको छ, “सरकारी सम्पदा र आफ्नै चौकी जोगाउन नसक्ने प्रहरी प्रशासन आज लोकतन्त्रका लागि लडेका नेताहरूलाई समात्न हजारौँको संख्यामा परिचालन हुनु दुःखद छ।” उहाँले यो कदमलाई शुद्ध राजनीतिक पूर्वाग्रह र प्रतिशोधको संज्ञा दिनुभएको छ।

आजै बस्दै सचिवालय बैठक
अध्यक्ष ओलीको गिरफ्तारीपछि उत्पन्न परिस्थितिको समीक्षा गर्न र आन्दोलनका थप कार्यक्रमहरू तय गर्न एमालेको सचिवालय बैठक आज बिहान ८:३० बजे बस्दैछ। उक्त बैठकले देशभर गरिने प्रदर्शन र विरोधका स्वरूपहरू तय गर्ने बताइएको छ।

आन्दोलनमा सहभागी हुन आह्वान
नेता बस्नेतले लोकतान्त्रिक मूल्य–मान्यताको रक्षा र प्रतिशोधको राजनीति अन्त्यका लागि भन्दै एमाले कार्यकर्ता र आम नागरिकलाई सडकमा उत्रिन आह्वान गर्नुभएको छ। “देशलाई द्वन्द्वबाट जोगाउन र लोकतन्त्रको रक्षाका लागि प्रदर्शनमा सहभागी बनौँ,” उहाँको सन्देशमा उल्लेख छ।