भोलिदेखि देशभर नेपाली सेना परिचालन

काठमाडौं। सरकारले आगामी फागुन २१ गते हुने प्रतिनिधिसभा निर्वाचनको सुरक्षा व्यवस्थापनका लागि भोलि माघ २१ गतेदेखि देशभर नेपाली सेना परिचालन गर्ने भएको छ । सरकारले एकीकृत निर्वाचन सुरक्षा योजना–२०८२ स्वीकृत गरेसँगै कार्यविधिअनुसार बुधबारदेखि सेना परिचालन गर्न लागिएको हो ।

निर्वाचन सुरक्षार्थ ७९ हजार ७२७ जना नेपाली सेना परिचालन गरिनेछ । हाल सशस्त्र प्रहरीले सुरक्षा दिइरहेका सार्वजनिक भवन, कारागार तथा अन्य संवेदनशील स्थानमा समेत नेपाली सेनाले सुरक्षा जिम्मेवारी सम्हाल्ने बताइएको छ । निर्वाचन आयोगको उच्चस्तरीय सुरक्षा समितिको सिफारिसअनुसार राष्ट्रपति रामचन्द्र पौडेलले गत मंसिर ११ गते सेना परिचालनको स्वीकृति प्रदान गरिसक्नुभएको थियो ।

सुरक्षा योजना अनुसार आवश्यकताअनुसार गस्ती तथा पेट्रोलिङ सञ्चालन गरिनेछ भने संवेदनशील क्षेत्र र मतदानस्थलको अवस्थालाई मध्यनजर गर्दै संयुक्त गस्ती पनि गरिने जनाइएको छ ।

निर्वाचन सुरक्षामा नेपाल प्रहरीबाट ७५ हजार ५९७ जना खटिनेछन् । साथै, प्रहरी मातहत रहने गरी १ लाख ३० हजार ९८० जना निर्वाचन प्रहरी परिचालन हुनेछन् । सशस्त्र प्रहरी बलबाट ३४ हजार ५७६ जना सशस्त्र प्रहरी र सशस्त्र प्रहरी मातहत रहने गरी १५ हजार ११० जना निर्वाचन प्रहरी परिचालन गरिनेछ । यस्तै, १ हजार ९२१ जना गुप्तचरसमेत निर्वाचन सुरक्षामा परिचालन हुने जनाइएको छ ।

सरकारले व्यापक सुरक्षा व्यवस्था मार्फत निष्पक्ष, स्वतन्त्र र शान्तिपूर्ण निर्वाचन सुनिश्चित गर्ने लक्ष्य लिएको जनाएको छ