श्रीमान्–श्रीमती विवादका बीच तीन महिने शिशुको हत्या

गुल्मी । गुल्मी जिल्लाको इस्मा गाउँपालिका–३ छल्दीटारमा श्रीमान्–श्रीमतीबीचको विवादका क्रममा तीन महिने शिशुको हत्या भएको छ।

जिल्ला प्रहरी कार्यालय गुल्मीका सूचना अधिकारी प्रहरी नायब उपरीक्षक गंगाबहादुर सारुका अनुसार ४६ वर्षीय सन्तबहादुर कुमालले आफ्नै तीन महिने छोरा सुवास कुमालको हत्या गरेका हुन्। प्रारम्भिक अनुसन्धानअनुसार उनले मादक पदार्थ सेवन गरेका अवस्थामा घटना घटाएको खुलेको छ। घटना बिहान करिब ९:३० बजेतिर भएको जनाइएको छ।

घटनाबारे मृतक शिशुकी जेठी छोरी सरिता कुमालले प्रहरी चौकी हस्तीचौरमा जानकारी गराएकी थिइन्। सूचनापछि प्रहरी सहायक निरीक्षक विनयकुमार श्रीवास्तवको कमाण्डमा दुई जना र जिल्ला प्रहरी कार्यालयबाट प्रहरी निरीक्षक पर्वतकुमार केसीको नेतृत्वमा पाँच जनाको टोली घटनास्थलमा खटिएको थियो।

शिशुको हत्या गरेको आरोपित बुबा सन्तबहादुर कुमालले घटनामा संलग्न भएको स्वीकार गरेको प्रहरीले जनाएको छ। यद्यपि घटनाको स्पष्ट कारण भने अझै खुल्न सकेको छैन।

प्रहरीका अनुसार घटनाबारे थप अनुसन्धान जारी रहेको छ।