सुर्खेतमा बिल नभएकाे नक्कली चुराेट सहित १ जना पक्राउ

सुर्खेत, — सुर्खेतकाे वीरेन्द्रनगर – ३ मुलपानि चाेकमा बिल-बिजक नभएको नक्कली चुरोट बिक्री वितरण गरेको आरोपमा प्रहरीले एक जनालाई पक्राउ गरेको छ।

बिल-बिजक नभएको नक्कली चुरोटको कारोबार भइरहेको भन्ने गोप्य सूचनाका आधारमा शनिबार साँझ करिब ८:३० बजे प्रहरी टोलीले पक्राउ गरेकाे हाे ।

जिल्ला प्रहरी कार्यालय सुर्खेतका अुनसार वीरेन्द्रनगर–३ का करिब ३५ वर्षीय जीवन कुमार शाहीले सञ्चालन गरेको ‘मेसी स्टोर’ मा छापा मार्दा खुकुरी ब्रान्डको नक्कली चुरोट २५ डण्डा (५०० बट्टा) र खुला ४ बट्टा गरी जम्मा ५०४ बट्टा बरामद भएकाे छ ।

उक्त चुरोट बिक्री वितरण गर्दै गरेको अवस्थामा पक्राउ परेका शाहीलाई प्रहरीले नियन्त्रणमा लिएर आवश्यक कानूनी कारबाहीका लागि राजश्व अनुसन्धान कार्यालय सुर्खेत पठाएको प्रहरीले जनाएकाे छ।

हाल यस सम्बन्धमा थप अनुसन्धान भइरहेको प्रहरीले जनाएको छ।