जेन जी आन्दोलनको भावनालाई सम्मान गर्दै सुधारको योजना सहित काम गर्न मुख्यमन्त्री कँडेलको निर्देशन

सुर्खेत — कर्णाली प्रदेशका मुख्यमन्त्री यामलाल कँडेलले भदौ २३ गतेको जेन जी आन्दोलनले उठाएका सकारात्मक माग र भावनालाई सम्मान गर्दै सुधारको स्पष्ट योजना सहित काम गर्न प्रदेशका सचिवहरूलाई निर्देशन दिएका छन्।

शुक्रबार कर्णाली प्रदेश सरकारका प्रमुख सचिव र सबै मन्त्रालयका सचिवहरूसँगको बैठकलाई सम्बोधन गर्दै मुख्यमन्त्री कँडेलले सुधारका प्रतिबद्धता कागजमै सीमित नराखी व्यवहारमा रूपान्तरण गर्न आग्रह गरे। उनले जनताले पारदर्शी, जवाफदेही र सहज सेवा अपेक्षा गरिरहेको बताउँदै “कार्यालयका ढोका जनताका लागि खुला हुनुपर्छ, कागजपत्रमा मात्र होइन, व्यवहारमा पनि पारदर्शिता देखिनुपर्छ,” भने।

मुख्यमन्त्री कँडेलले विगतका कमजोरीबाट पाठ सिक्दै नयाँ सोच र कार्यशैलीका साथ काममा गति दिनुपर्नेमा जोड दिए। “हामीले हिजोका कमजोरी सुधारका उपाय खोज्नुपर्छ,” उनले भने।

उनका अनुसार सरकारले खर्च कटौती, कार्यक्षमता वृद्धि र परिणाममुखी सेवा प्रवाहलाई प्राथमिकतामा राखेको छ। उनले सङ्घ सरकारसँग प्रतिस्पर्धा गर्न सक्ने किसिमको खर्च कटौती गर्ने, तालिम, भ्रमण, गोष्ठी तथा आवश्यक नभएका योजनाबाट खर्च घटाउने प्रस्ताव ल्याउन सचिवहरूलाई निर्देशन दिए।

मुख्यमन्त्री कँडेलले प्रत्येक मन्त्रालय र कार्यालयमा देखिने अनावश्यक खर्च, ढिलासुस्ती र प्रक्रियागत जटिलता अन्त्य गर्न जोड दिँदै सेवाप्रवाहमा सरलता ल्याउने र जनतामुखी प्रशासनिक सुधारलाई व्यवहारमा उतार्न निर्देशन दिएका छन्।