लुम्बिनीमा जेनजी आन्दोलनबाट करोडौंको भौतिक क्षति

जेनजी आन्दोलनका क्रममा लुम्बिनी प्रदेश सरकार र मातहतका विभिन्न निकायमा ठूलो भौतिक क्षति पुगेको छ । मुख्यमन्त्री तथा मन्त्रिपरिषद् कार्यालयले सार्वजनिक गरेको प्रारम्भिक विवरणअनुसार भदौ २३ र २४ गतेको आन्दोलनका क्रममा बुटवलस्थित प्रदेश प्रमुखको कार्यालय, मुख्यमन्त्री निवास र सम्पर्क कार्यालय पूर्ण रूपमा क्षतिग्रस्त भएका छन् । मुख्यमन्त्री निवासमा रहेका तीनवटा सवारी साधनसमेत जलेर नष्ट भएका छन् । प्रदेशका निमित्त प्रमुख सचिव लीलाधर सुवेदीका अनुसार भौतिक पूर्वाधार विकास मन्त्रालयअन्तर्गत दाङमा सात मोटरसाइकल र एक गाडी नष्ट भएका छन् भने आर्घाखाँचीमा सामान्य तोडफोड भएको छ । सहरी विकास मन्त्रालयअन्तर्गत रुपन्देहीमा एक मोटरसाइकल जलाइएको र दाङको लमहीस्थित मन्त्री क्वार्टरका सामग्रीमा आगजनी भएको छ ।

बुटवलस्थित लेखा नियन्त्रक कार्यालयमा करिब रु ९६ लाख बराबरको क्षति भएको छ । उद्योग, पर्यटन तथा यातायात मन्त्रालयका रुपन्देही, बाँके, दाङका यातायात कार्यालय, भैरहवाको उद्योग निर्देशनालय, दाङको घरेलु तथा साना उद्योग कार्यालय र बाँकेको पर्यटन सूचना केन्द्र पूर्ण रूपमा क्षतिग्रस्त भएका छन्  यस्तै, स्वास्थ्यमन्त्री निवासमा क्षति पुगेको छ भने ऊर्जा मन्त्रालयअन्तर्गत दाङमा आठ मोटरसाइकल जलेका छन् । वन निर्देशनालय पनि पूर्ण रूपमा क्षतिग्रस्त भएको छ । प्रदेश लोकसेवा आयोगमा भवनमा आगजनी र तोडफोड, स्टोर नष्ट, कर्मचारी तथा जनप्रतिनिधिका सम्पत्ति विवरण नष्ट हुनुका साथै छवटा गाडी जलेर नष्ट भएका छन् । तर, राप्ती उपत्यका देउखुरीस्थित प्रदेश सरकारको प्रशासनिक परिसर भने सुरक्षित रहेको सरकारको प्रारम्भिक प्रतिवेदनमा उल्लेख गरिएको छ ।