कर्णालीमा ९६ प्रतिशत रोपाइँ सम्पन्न

कर्णाली प्रदेशमा ९६ प्रतिशत रोपाइँ सम्पन्न भएको कृषि विकास निर्देशनालय कर्णाली प्रदेशले जानकारी दिएको छ । निर्देशनालयका अनुसार प्रदेशभरि ४१ हजार ४२ हेक्टर धानखेतीयोग्य जमिनमध्ये हालसम्म ३९ हजार ५९४.९ हेक्टरमा रोपाइँ भइसकेको हो । निर्देशनालयका निमित्त निर्देशक तिलकप्रसाद पाण्डेका अनुसार जुम्ला, हुम्ला र डोल्पा जिल्लामा १०० प्रतिशत रोपाइँ सम्पन्न भएको छ। जुम्लामा २,८९० हेक्टर, हुम्लामा ५८५ हेक्टर र डोल्पामा १९८ हेक्टरमा रोपाइँ गरिएको छ।

चार जिल्लामा ९९ प्रतिशतभन्दा बढी रोपाइँ भएको छ । जाजरकोटमा २,६४५ हेक्टरमध्ये २,६२३ हेक्टरमा (९९.२ प्रतिशत), तथा सल्यान, मुगु र रुकुम पश्चिममा समान रूपमा ९९ प्रतिशत रोपाइँ सम्पन्न भएको हो । कालिकोटमा २,४६२ हेक्टरमध्ये २,४१२ हेक्टरमा (९८ प्रतिशत) रोपाइँ सकिएको छ। प्रदेशमा सबैभन्दा धेरै धान खेती हुने सुर्खेतमा भने ९५ प्रतिशत रोपाइँ सम्पन्न भएको छ। सुर्खेतको १४,९२१ हेक्टरमध्ये १४,१७४.९५ हेक्टरमा रोपाइँ सकिएको हो । दैलेखमा ७,६२० हेक्टरमध्ये ७,०८६.६ हेक्टरमा रोपाइँ भएको निर्देशनालयले जनाएको छ।