भैरवीको सडक अवस्था : सरकार छेउमै, विकास कतै देखिन्न

दैलेख — दैलेखको भैरवी गाउँपालिका गठन भएको झन्डै ९ वर्ष पुग्न लागिसक्दा पनि विकासका काम अझै ‘विकासै’को खोजीमा छन्। पालिकाको केन्द्रसँगै जोडिने मुख्य सडक नै अहिले पनि धुलाम्मे र हिलाम्मे अवस्थामा छ। सडक यस्तो कि आम नागरिक त परै जाउन्, नेपाल प्रहरीका एक कर्मचारी आफैँ माटो सम्याउने काममा जुट्नुपरेको दृश्य सार्वजनिक भएको छ।

सरकार गठनदेखि नै समावेशी विकासका गफ गर्ने पालिकाले आफ्नै छेउको बाटो पनि हेर्न सकेको छैन भने, टाढाका वडाको अवस्था झनै कल्पनै गर्न सकिने अवस्था छैन। स्थानीय सरकारको नजर चुनावी नारासम्म मात्रै सीमित छ कि भन्ने प्रश्न जनताले उठाउन थालेका छन् । दैनिक आवतजावत गर्ने नागरिकले वर्षौंदेखि सास्ती भोग्दै आएका छन्, तर पालिका भने झट्ट सुन्दरी मुहार देखाउने झिल्के योजनामा व्यस्त देखिन्छ।