पत्रकार सुरक्षा राज्यको कर्तव्य हो, हस्तक्षेप होइन : मुख्यमन्त्री कँडेल

सुर्खेत,  कर्णाली प्रदेशका मुख्यमन्त्री यामलाल कँडेलले पत्रकारहरूको सुरक्षामा राज्यको भूमिकालाई हस्तक्षेपको रूपमा हैन, संरक्षणको रूपमा लिनुपर्ने बताएका छन् । आन्तरिक मामिला तथा कानुन मन्त्रालयद्वारा आइतबार आयोजित पत्रकार स्वास्थ्य बीमा पेलेसी हस्तान्तरण कार्यक्रममा बोल्दै मुख्यमन्त्री कँडेलले पत्रकारिता केवल चुनौतीपूर्ण पेशा मात्र नभइ लोकतन्त्रको मेरुदण्ड भएको उल्लेख गरे।“सत्यको खोजी गर्ने, जनताको आवाज बुलन्द पार्ने पत्रकारहरूको सुरक्षामा राज्यको संलग्नता अपरिहार्य हुन्छ,” उनले स्पष्ट पारे ।

प्रदेश सरकार प्रेस स्वतन्त्रताप्रति पूर्ण प्रतिबद्ध रहेको उल्लेख गर्दै मुख्यमन्त्री कँडेलले सञ्चार क्षेत्र र सरकारबीच पारदर्शिता, सम्मान र सहकार्यको वातावरण विकास गर्नुपर्नेमा जोड दिए । कार्यक्रममार्फत प्रदेश सरकारको सहयोगमा कर्णाली प्रदेशका ६९३ जना क्रियाशील पत्रकारहरूको स्वास्थ्य बीमा गरिएको छ। नेपाल पत्रकार महासंघ कर्णाली प्रदेश समितिको सहकार्यमा आन्तरिक मामिला तथा कानुन मन्त्रालयमार्फत सञ्चालित यो कार्यक्रम अन्तर्गत प्रत्येक पत्रकारले वार्षिक ७० हजार रुपैयाँसम्मको निःशुल्क औषधोपचार सेवा पाउनेछन्।

बीमा योजनाका लागि मन्त्रालय र राष्ट्रिय बीमा कम्पनी लिमिटेडबीच सम्झौता भएको हो। बीमा कम्पनीलाई स्वास्थ्य समस्या परेपछि ६० दिनभित्र वा अस्पतालबाट डिस्चार्ज भएको ३५ दिनभित्र जानकारी दिनुपर्ने व्यवस्था गरिएको छ।कार्यक्रममा महासंघ प्रतिनिधिहरूले सञ्चारकर्मीको सुरक्षामा प्रदेश सरकारले देखाएको सक्रियता ऐतिहासिक कदम भएको प्रतिक्रिया दिएका थिए । उक्त कार्यक्रममा मन्त्रालयका सचिव, कर्मचारी, पत्रकार महासंघ कर्णालीका पदाधिकारी, र विभिन्न सञ्चार संस्थाका प्रतिनिधिहरूको उपस्थिति रहेको थियो।