सुर्खेत प्रहरीको ठूलो सफलता, नक्कली नोट र अफिमको ठूलो सञ्जाल ध्वस्त, मिडिया सञ्चालकसहित ५ जना पक्राउ

प्रहरीले विभिन्न जिल्लामा सञ्जाल फैलाएर नक्कली नोटको कारोबार र लागुऔषध अफिमको तस्करीमा संलग्न एक संगठित गिरोहलाई पक्राउ गरेको छ । सुर्खेत, जाजरकोट र बाँकेमा गरिएको छुट्टाछुट्टै कारबाहीमा एक मिडिया सञ्चालकसहित ५ जनालाई पक्राउ गरी उनीहरूको साथबाट १२ लाखभन्दा बढी नक्कली नोट, ३० केजीभन्दा बढी अफिम र नोट छाप्न प्रयाेग भएका कम्प्यूटर लगाएत बरामद गरेकाे छ। घटनाको सुरुवात असार १० गते बिहान सुर्खेतको वीरेन्द्रनगर नगरपालिका १० शान्ति टोलबाट भएको थियो । प्रहरीले विशेष सूचनाको आधारमा जाजरकोट कुशे गाउँपालिका ५ की २२ वर्षीया दिलमाया सिंह ठकुरीलाई ६ हजार नक्कली नोटसहित पक्राउ गरेपछि यो ठूलो सञ्जालको पर्दाफास भएको हो ।

दिलमायासँगको प्रारम्भिक अनुसन्धानपछि प्रहरीले सोही दिन जाजरकोट कुशे गाउँपालिका ५ खुर्पाका ३३ वर्षीय राम बहादुर सिंहको डेरामा छापा मारेको थियो । त्यहाँबाट प्रहरीले लुकाइराखेको अवस्थामा १ हजार दरका १२३६ थान, अर्थात् १२ लाख ३६ हजार रुपैयाँ बराबरको नक्कली नोट बरामद गर्‍यो । अनुसन्धानलाई थप बढाउँदै प्रहरीले असार १२ गते सुर्खेतको भेरीगंगा नगरपालिका १२, ठकुरीटोलमा डेरा गरी बस्ने जाजरकोटका ३५ वर्षीय कृष्ण बहादुर वली र ३८ वर्षीय प्रेम बहादुर बिकलाई पक्राउ गर्‍यो । उनीहरूको साथबाट कालो झोलामा लुकाएर राखेको ११ किलोग्राम १७२ मिलिग्राम अफिम जस्तो देखिने गिलो पदार्थ बरामद भएको प्रहरीले जनाएको छ ।

यसैगरी, लागुऔषध र जाली नोटको अनुसन्धानकै क्रममा प्रहरीले बाँकेको कोहलपुरमा अर्को ठूलो सफलता हात पारेको छ । कोहलपुरमा जनगर्जन नेटवर्क प्रा.लि. नामक मिडिया सञ्चालन गर्दै आएका कालीकोट नरहरीनाथ गाउँपालिका ४ घर भएका ३४ वर्षीय मन बहादुर सहकारीलाई प्रहरीले पक्राउ गरेको छ । उनको मिडिया हाउस र डेराबाट थप ५१ हजार नक्कली नोट, १९ केजी ३०० ग्राम अफिम जस्तो देखिने पदार्थ, र नक्कली नोट छाप्न प्रयोग हुने क्याननकाे प्रिन्टर, सीपीयू, किबोर्ड, र क्यामेरासहितका उपकरणहरू बरामद गरिएको छ। पक्राउ परेका सबैलाई आर्थिक, लागुऔषध, मुद्रासम्बन्धी र संगठित अपराधको कसुरमा अनुसन्धान अगाडि बढाइएको प्रहरीले जानकारी दिएको छ । यो घटनाले पहाडी जिल्लाहरूमा समेत अपराधको सञ्जाल कसरी फैलिएको छ भन्ने खुलासा गरेको छ । अपराध अनुसन्धानमा खटिएकाे प्रहरीले नागरिककाे साथ र सहयाेगले याे सफलता हाँसिल गर्न सफल भएकाे बताएकाे छ । पत्रकारहरूकाे प्रश्नकाे जवाल दिदै जिल्ला प्रहरी कार्यालय सुर्खेतका एसपी सुधिर जंग शाहीले नागरिकले सुचना दिएका कारण अनुसन्धनमा सफलता मिलेकाे बताएका हुन । उनले अझै पनी यस्ता खालका सुचनाकाे अाशा गरिएकाे बताएका छन् ।