सुर्खेतमा अवैध ४०० लिटर मदिरासहित एक जना पक्राउ

सुर्खेत।  जिल्ला प्रहरी कार्यालय सुर्खेतले वीरेन्द्रनगरमा सञ्चालित एक अवैध मदिरा भट्टीमा छापा मारेर ठूलो परिमाणमा घरेलु मदिरा बरामद गरेको छ। प्रहरीले ४०० लिटर अवैध मदिरा र कच्चा पदार्थसहित एक व्यक्तिलाई पक्राउ गरेको छ।

सुर्खेत प्रहरीका अनुसार, वीरेन्द्रनगर नगरपालिका-१, लगनशिल टाेलमा अवैध रूपमा मदिरा उत्पादन, भण्डारण तथा बिक्री-वितरण भइरहेको भन्ने गोप्य सूचनाको आधारमा आइतबार बिहान करिब ११ बजे प्रहरी टोली खटाइएको थियो। त्यस क्रममा सल्यानको बागचौर नगरपालिका-२ घर भई हाल गैरीगाउँस्थित पवित्रा सुनारको घरमा डेरा गरी बस्ने ३३ वर्षीय नवराज परियारलाई आफ्नै कोठामा अवैध मदिरा उत्पादन गरिरहेको अवस्थामा रंगेहात फेला पारिएको हो।

प्रहरीले परियारको डेराकोठाबाट २० लिटरका २२ वटा बाल्टिनमा राखिएको ३८५ लिटर कच्चा पदार्थ र बिक्रीका लागि तयारी अवस्थामा रहेको १५ लिटर घरेलु मदिरा गरी जम्मा ४०० लिटर बरामद गरेको थियो।

पक्राउ परेका परियारलाई आवश्यक कारबाहीका लागि आन्तरिक राजस्व कार्यालय, वीरेन्द्रनगर पठाइएको प्रहरीले जनाएको छ। साथै, बरामद गरिएको सम्पूर्ण मदिरा र कच्चा पदार्थ स्थानीय जनप्रतिनिधिको  उपस्थितिमा नष्ट गरिएको छ।