फेवातालमा दुई प्याराग्लाइडर खस्दा चार जनाको सकुशल उद्धार

पोखराको फेवातालमा दुईवटा प्याराग्लाइडर खस्ने घटना भएको छ। पोखरा महानगरपालिका–१८ तोरेपानीबाट उडेको प्याराग्लाइडिङहरू अवतरणको क्रममा अनियन्त्रित भई फेवा तालको बीचभागमा खसेको सशस्त्र प्रहरी बल नेपालले जनाएको छ। दुर्घटनापछि सशस्त्र प्रहरी बल नेपाल नम्बर २४ कालिका गण कास्कीबाट खटिएको फेवा रेस्क्यु टावरस्थित टोलीले तत्काल उद्धार कार्य सञ्चालन गर्दै चार जनालाई दिउँसो ३ बजे सकुशल बाहिर निकालेको हो।

सशस्त्र प्रहरी बलका सहप्रवक्ता डीएसपी शैलेन्द्र थापाका अनुसार, उद्धार गरिएकाहरूमा भारतको बनारसका ४१ वर्षीय अकलेश यादव र ३५ वर्षीय चन्दनकुमार पटेल रहेका छन्। उनीहरू सवार प्याराग्लाइडिङका पाइलट ३० वर्षीय मिलन शाह (अग्नि प्याराग्लाइडिङ) र २८ वर्षीय विश्वास अधिकारी (ह्याप्पी फ्लाई प्याराग्लाइडिङ) पनि सकुशल छन्।