भारतले गर्‍यो पाकिस्तानमाथि मिसाइल आक्रमण: कम्तिमा ३० जनाको मृत्यु

काठमाडौं । भारतले पाकिस्तानमा मिसाइल आक्रमण गरेको छ । भारतीय सेनाका अनुसार पाकिस्तान नियन्त्रित कश्मिरका आतंकवादी क्षेत्रलाई लक्षित गरी मिसाइल आक्रमण गरिएको हो । सो आक्रमणमा कम्तिमा ३० जनाको मृत्यु भएको भारतीय मिडियाले उल्ल्लेख गरेका छन् ।

पहलगाम आतंकवादी आक्रमण भएको १५ दिनपछि भारतले पाकिस्तानमाथि मिसाइल अहमला गरेको हो । यो आक्रमणलाई भारतीय सेनाले ‘अपरेशन सिन्दूर’ नाम दिएको छ ।

भारत सरकारद्वारा जारी विज्ञप्तिामा भनिएको छ, ‘यस अपरेशनमा पाकिस्तान र पाकिस्तानद्वारा कब्जा गरिएको कश्मिरमा रहेका आतंकवादी संरचनालाई निशाना बनाइएको छ, जहाँबाट भारतमाथि आतंकवादी हमलाको योजना बनाएर कार्यान्वयनमा ल्याइएको थियो ।’

भारतले आतंकवादीहरुलाई लक्षित गरी मुजफ्फराबाद, बाघ, गुलपुर, कोटली, भीमबेर, सियालकोट, मुरिदके, चक अमरु र बहावलपुरमा एयरस्ट्राइक गर्दा ३० जनाको मृत्यु भएको भारतीय अनलाइन पत्रिका ‘द भाष्कर’ले उल्लेख गरेको छ ।

यस्तै, अन्तर्राष्ट्रिय समाचार संस्था रोयटर्सले पनि पाकिस्तानका सीमावर्ती क्षेत्रहरुमा गोलाबारी र विष्फोटहरु भएको जनाएको छ । भारत र पाकिस्तानबीचको सम्बन्ध २२ अप्रिलमा जम्मु–कश्मिरको पहलगाममा पर्यटकमाथि भएको हमलापछि तनावपूर्ण भएको छ । सो हमलामा एक नेपालीसहित २६ जनाको मृत्यु भएको थियो । सो आतंकवादी आक्रमणमा पाकिस्तानले सघाएको र युद्धविराम सम्झौताको उल्लंघन गरेको आरोप भारतले लगाएको छ ।

भारतीय सेनाले भनेको छ, ‘पाकिस्तानले फेरि एकपटक युद्धविराम सम्झौताको उल्लङ्घन गरेको छ । भारतीय सेनाले यसको उचित तरिकाले जवाफ दिइरहेको छ ।’ भारतले नौ स्थानमा आक्रमण गरेको भनिएपनि पाकिस्तानका प्रधानमन्त्री शहबाज शरीफले पाँच स्थानमा आक्रमण भएको एक्समा लेखेका छन् ।

यस्तै, पाकिस्तानका प्रधानमन्त्री शहबाज शरीफले भारतले लगाएका आरोपहरुको खण्डन गर्दै भारतले गरेको आक्रमणको उचित जवाफ दिने बताएका छन् । उनले सामाजिक सन्जाल एक्समा लेखेका छन्, ‘भारतले पाकिस्तानका पाँच स्थानमा कायरतापूर्वक आक्रमण गरेको छ । पाकिस्तानलाई यस युद्धकार्यको कडा जवाफ दिने पूरा अधिकार छ र जवाफ दिइँदैछ ।’

पाकिस्तानका सम्पूर्ण जनता पाकिस्तानी सेनासँग एक भएर उभिएका र देशको मनोबल उच्च भएको उनले जनाएका छन् ।

‘पाकिस्तान र पाकिस्तानी सेनालाई थाहा छ कसरी दुश्मनसँग व्यवहार गर्नुपर्छ’ पाकिस्तानका प्रधानमन्त्रीले भनेका छन्, ‘हामी कहिल्यै पनि शत्रुलाई उसको उद्देश्यमा सफल हुन दिनेछैनौं ।’

पाकिस्तानका रक्षामन्त्री ख्वाजा आसिफले भारतले आतंकवादी ठेगानामा आक्रमण गरेको प्रचार गरेपनि सर्वसाधारण नागरिकको बस्तीमा आक्रमण भएको बताएका छन् । भारतको आक्रमणबाट एक महिला र एक बच्चा समेत मारिएको उनले उल्लेख गरेका छन् ।

उनले भनेका छन्, ‘उनीहरूले (भारतले) दाबी गरेका छन् कि आतंकवादी ठिकानाहरूलाई निशाना बनाएका छन् । म अन्तर्राष्ट्रिय मिडियालाई आग्रह गर्छु कि ती सबै स्थानहरू आफैं आएर हेर्नुहोस् ती आतंकवादी ठिकाना थिए वा नागरिक बस्ती । ती ठाउँहरूमा हाम्रो दुईवटा मस्जिद पनि थिए । एक बालक शहीद भएको छ, एक महिला शहीद भएकी छन् । मसँग हाल मृत्युसंख्या अपडेट छैन । तर यी सातवटा पुष्टि भएका टार्गेटमध्ये दुई कश्मीरमा र पाँच पाकिस्तानमा छन् । यी सबै निशाना नागरिक बस्तीमा थिए ।’