किसानलाई ५० प्रतिशत अनुदानमा कृषियन्त्र बितरण

सुर्खेत। सुर्खेतको चौकुनेगाउँपालिकाले उत्पादनमा वृद्धिसँगै व्यावसायिक कृषिमा प्रोत्साहन गर्ने उद्देश्यले चौकुनेगाउँपालिका वडा न ६ भित्रका किसानलाई ५० प्रतिशत अनुदानमा कृषियन्त्र वितरण गरेको छ । वडा भित्रका ५ जना किसानलाई छनोट गरेर अत्याधुनिक मिनी ट्रेलर वितरण गरिएको छ । चौकुने गाउँपालिकावडा न ६ का वडा अध्यक्ष गोबिन्द थापाले कृषि उत्पादन बढाई कृषिलाई व्यावसायिक बनाउन पहिलो किस्ता वापत ५ जना किसानलाई मिनि ट्रेलर बितरण गरिएको बताउनुभयो । उहाँले अनुदान पाउनका लागि निवेदन दर्ता गराएका किसानको घर–घरमा पुगेर अनुगमन गरी ५० प्रतिशत अनुदान पाउने किसान छनोट गरेर उनीहरुलाई यन्त्र उपलब्ध गराइएको बताउनुभयो ।

सो अवसरमा अनुदान पाउनुभएका किसानले यो सहयोगबाट कृषिलाई व्यावसायिक बनाउन ठूलो सहयोग पुग्ने जनाउँदै यसले उत्पादन पनि वृद्धि हुने विश्वास गरिएको छ । चौकुने गाउँपालिका –६ का किसान बसन्त कुमार बयकले मिनी ट्रेलर पाएपछि अब खेती गर्न निकै सहज र सरल हुनुका साथै कम समयमा बढी उत्पादन हुने बताउनुभयो । उहाँले आधुनिक कृषियन्त्रको सहाराले कृषिमा ठूलो परिवर्तन आउने बताउनुभयो ।

वडा –६ का अध्यक्ष गोबिन्द थापाले छनोटमा परेका अधिकांश किसानले कृषिलाई व्यावसायीकरण गर्ने जनाएकाले आधुनिक उपकरणले सो कामलाई सहज बनाउने बताउनुभयो । ४५ हजार मूल्य पर्ने मिनी ट्रेलरलाई अनुदानमा उपलब्ध गराउँदा किसानलाई २२,५६५( बाईस हजार पाँचसय छ पैसठ्ठी ) मात्र परेको उहाँले जानकारी दिनु भएको छ। उहाँका अनुसार पछिल्लो समयमा किसानले गाईगोरु पाल्न छाड्दै गएका छन् । जोत्नका लागि प्रयोग गरिने गोरु पाल्न छाडेपछि खेतीपातीमा समस्या हुँदा खेतबारी बाँझै हुने अवस्थामा पुगेका छन् ।

खेतबारी बाँझो हुन नदिन र किसानलाई खेतीपातीतिर उत्साहित गर्न चौकुने गाउँपालिकाले अनुदानमा मिनी ट्रेलर वितरण गरेको अध्यक्ष थापाले बताउनुभयो ।एकातिर किसानले गाईगोरु पाल्न छाडेका र अर्कोतिर परम्परागतभन्दा यान्त्रिक उपकरणले खेतबारी खनजोत गर्दा कम लागत पर्ने र छिटो-छरितो हुने भएकाले किसानको मागअनुसार मिनी ट्रेलर वितरण गरेको चौकुने गाउँपालिकाका कृषि शाखा प्रमुख लोकमणी जोशीले बताउनुभएको छ ।