सुर्खेतमा पौडी खेल्ने क्रममा भेरी नदीमा डुबेर एक युवकको मृत्यु

सुर्खेत, ४ असार (२०८३) । सुर्खेतको वीरेन्द्रनगर नगरपालिका–११ स्थित झुप्राखोलामा पौडी खेल्ने क्रममा भेरी नदीमा डुबेर एक युवकको मृत्यु भएको छ।

मृत्यु हुनेमा वीरेन्द्रनगर नगरपालिका–११ सुब्बाकुना निवासी लाल बहादुर ठाडा मगरका २० वर्षीय छोरा मनोज ठाडा मगर रहेका छन्।

जिल्ला प्रहरी कार्यालय सुर्खेतका अनुसार बुधबार झुप्राखोलामा पौडी खेल्ने क्रममा मनोज अचानक पानीमा डुबेका थिए।

नदीमा डुबेर अचेत भएका उनलाई उनका बुबाले तत्काल उद्धार गरी उपचारका लागि राति ११:४५ बजे कर्णाली प्रदेश अस्पताल कालागाउँ, सुर्खेत पुर्‍याएका थिए। अस्पताल पुर्‍याउनासाथ चिकित्सक टोलीले उनलाई मृत घोषणा गरेको प्रहरीले जनाएको छ।

प्रहरीले घटनाबारे आवश्यक अनुसन्धान अगाडि बढाएको जनाएको छ।