“सावधान ! गलत तरिकाले चिया पिउँदा स्वास्थ्यमा असर पर्न सक्छ “

विशेषगरी खाली पेटमा चिया पिउने, दिनमा अत्यधिक चिया सेवन गर्ने, धेरै उमालेर गाढा चिया बनाउने, खाना खाएलगत्तै चिया पिउने तथा अत्यधिक चिनी प्रयोग गर्ने बानी स्वास्थ्यका लागि हानिकारक मानिन्छ।

खाली पेटमा चिया पिउँदा एसिडिटी, ग्यास, जलन तथा कब्जियतजस्ता समस्या निम्तिन सक्छन्। त्यसैगरी दिनमा धेरै पटक चिया पिउँदा शरीरमा क्याफिनको मात्रा बढेर निद्रामा समस्या, घबराहट र थकान बढ्न सक्छ।

स्वास्थ्य विज्ञहरूका अनुसार धेरै समय उमालेको चियामा ट्यानिन्स र क्याफिनको मात्रा बढ्ने भएकाले पाचन प्रणालीमा असर पर्न सक्छ। खाना खाएलगत्तै चिया पिउँदा शरीरले आइरन तथा अन्य पोषक तत्व राम्रोसँग अवशोषण गर्न नसक्ने पनि बताइएको छ।

त्यस्तै अत्यधिक चिनी मिसाएर चिया पिउने बानीले मोटोपना, मधुमेह तथा रगतमा चिनीको मात्रा बढ्ने जोखिम निम्त्याउन सक्छ। स्वास्थ्यका लागि दिनमा सीमित मात्रामा चिया पिउने, कम चिनी प्रयोग गर्ने तथा सही समयमा सेवन गर्ने बानी अपनाउन विज्ञहरूले सुझाव दिएका छन्।