बालश्रम मुद्दामा एमाले सांसद रेखा शर्मा पक्राउ: ‘बालेन युग’मा पुराना फाइल खुल्दै, ओली हिरासतमा, महेश बस्नेतको खोजी

‘सरी नानु, समय आउँछ।’ प्रधानमन्त्री बालेन शाहको यो चर्चित वाचा अन्ततः पूरा भएको छ। बालश्रम र हिंसाको आरोप लागेकी एमाले प्रदेश सांसद रेखा शर्मालाई प्रहरीले आइतबार मध्यराति पक्राउ गरेको छ। तत्कालीन ओली सरकारले मुद्दा नचलाउने निर्णय गर्दै उनलाई जोगाएको भए पनि, काठमाडौं महानगरले विगतमा उद्धार गरेकी ती बालिकाले अन्ततः न्याय पाउने आशा पलाएको छ।

सत्ताको आडमा जोगिएका हाइप्रोफाइल व्यक्तिहरूको फाइल खोल्ने अभियानअन्तर्गत वर्तमान ‘बालेन सरकार’ निकै आक्रामक देखिएको छ। यसै अभियानको शृंखलामा पूर्वप्रधानमन्त्री केपी शर्मा ओलीलाई समेत पक्राउ गरिएको छ भने एमालेका अर्का नेता महेश बस्नेतलाई पक्राउ गर्न व्यापकरूपमा प्रहरी परिचालन गरिएको छ।

शर्माको पक्राउ र ओलीको गिरफ्तारीसँगै तत्कालीन सरकारले जोगाएका आरोपितहरूको उठिबास सुरु भएको छ। विगतमा शक्तिको आडमा दबाइएका अपराधका फाइलहरू एकपछि अर्को गर्दै खुल्न थालेपछि राजनीतिक वृत्तमा ठूलो भूकम्प गएको छ। सत्ताको आडमा जोगिएकाहरू धमाधम पक्राउ पर्दै गर्दा अब पालो कसको ? सर्वसाधारणमा चासो बढेको छ।