‘भिआइपी मुभमेन्ट’का नाममा नागरिकले दुःख पाउनु भएनः गृहमन्त्री सुधन गुरुङ

गृह मन्त्रालयमा पदभार ग्रहण गरेपछि कर्मचारीलाई निर्देशन दिँदै उनले परिवर्तनको सुरुआत आफैंबाट गर्नुपर्नेमा जोड दिए। जेनजी आन्दोलनका अगुवा रहेका मन्त्री गुरुङले मन्त्रीहरूको सेवासुविधा कटौती र सवारी आवागमनका क्रममा नागरिकलाई दुःख दिने प्रवृत्ति अन्त्य गर्नुपर्ने बताएका थिए।

“नागरिक तहमा ‘भिआइपी मुभमेन्ट’ले गाह्रो पार्दै आएको छ, यस्तो कार्य नगर्न सबै मन्त्रीहरूलाई आग्रह गर्दछु,” उनले भने।

मन्त्री गुरुङले सांसदको सुविधा जनतालाई समर्पण गर्ने घोषणा गरेका छन् भने पदभार ग्रहणपछि निजी सवारी प्रयोग गर्दै मन्त्रालयबाट बाहिरिएका थिए।

यसैबीच, मन्त्रालय तथा मातहतका निकायबाट हुने सेवा प्रवाहलाई एकद्वार प्रणालीमार्फत सञ्चालन गर्ने निर्णय गरिएको छ। साथै, जेनजी आन्दोलनका सहिद परिवार र घाइतेलाई राज्यका तर्फबाट सुविधा उपलब्ध गराउन विभिन्न मन्त्रालयका प्रतिनिधिसहित कार्यदल गठन गरिने उनले जानकारी दिए।