हेलिकप्टरमार्फत उद्धार गरिएकी सुत्केरी र नवजात शिशुको मृत्यु

बाजुरा — बाजुराको दुर्गम क्षेत्रबाट हेलिकप्टरमार्फत उद्धार गरिएकी एक सुत्केरी महिला र उनका नवजात शिशुको उपचारका क्रममा निधन भएको छ।

बडीमालिका नगरपालिका–१ सल्लेनाकी २१ वर्षीया सुरता कुमारी रोकाया र उनका शिशुको सुर्खेतस्थित प्रादेशिक अस्पतालमा मृत्यु भएको हो।

परिवारका अनुसार, मुटु रोगबाट पीडित सुरतालाई चिकित्सकले दोस्रो सन्तान नजन्माउन सुझाव दिएका थिए। तर पुनः गर्भवती बनेपछि गर्भावस्थाको अन्तिम चरणमा उनको स्वास्थ्य अवस्था गम्भीर बनेको थियो।

गाउँमा आवश्यक उपचार सम्भव नभएपछि उनलाई तत्काल हेलिकप्टरमार्फत उद्धार गरी सुर्खेत लगिएको थियो। अस्पतालमा चिकित्सकहरूले आमा र शिशु दुवैलाई बचाउन प्रयास गरे पनि सफल हुन सकेनन्।

दुर्गम क्षेत्रमा समयमै स्वास्थ्य सेवा नपुग्दा यस्ता दुःखद घटना दोहोरिने गरेको भन्दै स्थानीयले स्वास्थ्य सेवामा सुधारको आवश्यकता औंल्याएका छन्।