सुर्खेतमा ब्राउनसुगरसहित दुई जना पक्राउ

सुर्खेत । सुर्खेतको वीरेन्द्रनगरमा दुई जनालाई ब्राउनसुगरसहित प्रहरीले पक्राउ गरेको छ। आइतबार दिउँसो करिब २ बजे वीरेन्द्रनगर नगरपालिका–१०  मा लागूऔषधको कारोबार भइरहेको सूचना प्राप्त भएपछि जिल्ला प्रहरी कार्यालय सुर्खेत र लागूऔषध नियन्त्रण शाखा कार्यालय सुर्खेतबाट संयुक्त प्रहरी टोली खटिएको थियो।

उक्त टोलीले शंकास्पद अवस्थामा फेला पारेका वीरेन्द्रनगर नगरपालिका–१० निवासी २८ वर्षीय दिपक विक र २५ वर्षीय अशोक विकलाई नियन्त्रणमा लिई शरिर तथा घरकोठा खानतलासी गर्दा उनीहरूको साथबाट शुद्ध ५ ग्राम ४२० मिलिग्राम लागूऔषध ब्राउनसुगर रितपूर्वक बरामद गरिएको जिल्ला प्रहरी कार्यालय सुर्खेतले जनाएको छ।

पक्राउ परेका दुवै जनालाई नियन्त्रणमा लिई जिल्ला प्रहरी कार्यालय सुर्खेतमा ल्याई लागूऔषध सम्बन्धी मुद्दा दर्ता गरिएको छ। अदालतबाट म्याद थप गरी घटनाबारे थप अनुसन्धान भइरहेको प्रहरीले जानकारी दिएको छ।