बैतडीमा जन्ती बोकेको बस दुर्घटना : १३ जनाको मृत्यु

बैतडी। बैतडीको पुर्चौडी नगरपालिका–७ वडुगाउँ मोडमा बिहीबार राति जन्ती बोकेको बस दुर्घटना हुँदा १३ जनाको मृत्यु भएको छ।

दुर्घटनामा मृत्यु हुनेमा सहोदर दाजु–भाइ नरेन्द्रराज जोशी (प्राविधिक सहायक) र विष्णुदत्त जोशी (शिक्षक) रहेका छन्। उनीहरू बेहुलाका सहोदर काका हुन्। यस्तै कृषि प्राविधिक वसन्तराज जोशी, उनका सहोदर भिनाजु वसन्तराज रताला, बुवा–छोरा मोहनदेव भट्ट र केशवराज भट्ट तथा १४ वर्षीय सुशील जोशी (बेहुलीका भाइ) ले पनि ज्यान गुमाएका छन्।

अन्य मृतक तथा घाइतेहरू पनि बेहुला परिवारका आफन्त र इष्टमित्र नै रहेको प्रहरीले जनाएको छ।

प्रहरीका अनुसार बस बैतडीको पुर्चौडीबाट बेहुली लिएर बझाङको सुनकुडातर्फ जाँदै गर्दा साँघुरो र उकालो सडकमा घुम्ती काट्ने क्रममा ‘ब्याक’ गर्दा भीरबाट खसेको हो। दुर्घटनापछि चालक वीरेन्द्र बुढालाई नियन्त्रणमा लिइएको छ।

प्रारम्भिक अनुसन्धानमा दुर्घटनाको कारण साँघुरो बाटो र ओभरलोड रहेको प्रहरीको भनाइ छ। दुर्घटनामा बेहुलाका एक काकाको खुट्टा भाँचिएको छ भने ठूलो बुवा घाइते भएका छन्। घाइतेहरूको उपचार भइरहेको प्रहरीले जनाएको छ।