कसैलाई गालीगलौज नगर्न रवि लामिछानेको आग्रह

काठमाडौं। राष्ट्रिय स्वतन्त्र पार्टी (रास्वपा) का सभापति रवि लामिछानेले चितवन क्षेत्र नम्बर २ मा औपचारिक रूपमा चुनावी प्रचार सुरु गरेका छन्।

शुक्रबार चितवन–२ का विभिन्न स्थानमा खोलिएका पार्टी कार्यालयको उद्घाटन गर्दै लामिछानेले चुनावी अभियानको सुरुआत गरेका हुन्। सो अवसरमा उनले अबको लडाइँ कुनै दल वा उम्मेदवारविरुद्ध नभई गरिबी, अशिक्षा, बेरोजगारीलगायत देशका जटिल समस्याविरुद्ध भएको बताएका छन्।

चुनावी अभियानका क्रममा कसैलाई पनि गालीगलौज नगर्न आग्रह गर्दै उनले कसैले गाली गरे पनि त्यसको प्रतिवाद नगर्न कार्यकर्तालाई अनुरोध गरे। लामिछानेले अबको सबैभन्दा प्रभावकारी जवाफ मतदानको दिन मतपत्रमा छाप लगाएर दिने नै भएको धारणा व्यक्त गरे।

सभापति लामिछानेले निर्वाचनका क्रममा देशभर प्रचारमा जानुपर्ने भएकाले चितवनबासीसँग धेरै भेटघाट गर्न नपाउने उल्लेख गर्दै मतदानमार्फत समर्थन जनाउन आग्रह गरे।