चलचित्र पत्रकार दिनेश सिटौलाको निधन

चलचित्र पत्रकार दिनेश सिटौलाको उपचारका क्रममा निधन भएको छ। ब्रेन ह्यामरेजसम्बन्धी समस्यापछि काठमाडौँको ग्रान्डी अस्पतालमा भेन्टिलेटरमा उपचाररत सिटौलालाई आज दिउँसो १२ बजेर ४७ मिनेटमा चिकित्सकले मृत घोषणा गरेका हुन्। उहाँको उमेर ४५ वर्ष थियो।

ग्रान्डी अस्पतालले विज्ञप्ति जारी गर्दै सिटौलाको निधन भएको जानकारी गराएको छ। अस्पतालका अनुसार गम्भीर अवस्थामा उपचार भइरहेको भए पनि उहाँलाई बचाउन नसकिएको जनाइएको छ।

सिटौला राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाहको चुनावी अभियानका क्रममा अछाम पुगेका बेला अचानक बेहोस भएर ढलेका थिए। त्यसपछि अस्ति शुक्रबार हेलिकप्टरमार्फत काठमाडौँ ल्याई ग्रान्डी अस्पतालमा भर्ना गरिएको थियो।

स्वर्गीय सिटौला चलचित्र पत्रकार सङ्घका पूर्वअध्यक्षसमेत रहनुभएको थियो। उहाँको निधनप्रति चलचित्र क्षेत्र, पत्रकारिता जगत तथा विभिन्न राजनीतिक र सामाजिक क्षेत्रका व्यक्तिहरूले गहिरो दुःख व्यक्त गरेका छन्।

सिटौलाको आजै काठमाडौँस्थित पशुपति आर्यघाटमा अन्त्येष्टि गर्ने तयारी गरिएको परिवार स्रोतले जनाएको छ।