अभिभावक र विद्यालय शिक्षकहरूसँग प्रहरीद्वारा लागूऔषध दुर्व्यसन न्यूनीकरण सम्बन्धी जनचेतनामूलक कार्यक्रम सम्पन्न

पञ्चपुरी। सुर्खेतकाे पञ्चपुरी नगरपालिका–६,स्थित श्री विद्याज्योती माध्यमिक विद्यालयमा कर्णाली प्रदेश सरकारको सामाजिक विकास मन्त्रालय अन्तर्गत शिक्षा विकास निर्देशनालय, सुर्खेतको आयोजनामा अभिभावक शिक्षा सम्बन्धी तालिम २०८२ कार्यक्रम सम्पन्न भएको छ। कार्यक्रममा शिक्षक, स्थानीय अभिभावकहरू तथा समाजका प्रतिनिधिहरूको उपस्थितिमा ईलाका प्रहरी कार्यलय बाबियाचौरका प्रहरी निरीक्षक भुपेन्द्र शाहीले लागूऔषध दुर्व्यसन न्यूनीकरण सम्बन्धी चेतना फैलाउने विषयमा प्रशिक्षण प्रदान गर्नुभएको थियो ।

प्रहरी निरीक्षक शाहीले कार्यक्रममा अभिभावकहरूको सक्रिय भूमिका, बालबालिकामा सकारात्मक मूल्य शिक्षा, र समुदायमा सुरक्षित वातावरण सिर्जना गर्न अभिभावकहरूको सहयोग अनिवार्य रहेको बताउनुभयो। उहाँले लागूऔषधको दुष्प्रभाव, यसबाट व्यक्तिगत स्वास्थ्य र सामाजिक जीवनमा पर्ने नकारात्मक असरका साथै रोकथामका उपायहरूबारे विस्तृत जानकारी दिनुभयो।

कार्यक्रममा सहभागीहरूले आफ्ना अनुभव र चुनौतीहरू साटासाट गर्दै अभिभावक र शिक्षकहरूमाझ लागूऔषधबाट बच्नका लागि सामूहिक प्रयास आवश्यक रहेको बताएका थिए।