सुर्खेतमा सवारी दुर्घटना : मोटरसाइकल चालकको मृत्यु

सुर्खेत — सुर्खेतको वीरेन्द्रनगर नगरपालिका–११ भाङ्घारीमा भएको सवारी दुर्घटनामा एक जना मोटरसाइकल चालकको मृत्यु भएको छ।
साेमवार बिहान करिब ९:५० बजे सुर्खेतबाट नेपालगञ्जतर्फ जाँदै गरेको क.प्र.०२००१ ज.०६२३ नम्बरको ईभी गाडी र विपरीत दिशाबाट आउँदै गरेको भे.६ प.३३२१ नम्बरको मोटरसाइकल एक आपसमा ठोक्किँदा दुर्घटना भएको हो।
जिल्ला प्रहरी कार्यालय सुर्खेतका अनुसार मोटरसाइकल चालक लाटिकोइली निवासी करिब ४२/४३ वर्षीय पदमबहादुर बी.सी. गम्भीर घाइते भएका थिए।

घाइते बी.सी.को टाउको, खुट्टा तथा शरीरका विभिन्न भागमा चोट लागेको र प्रदेश अस्पताल कालागाउँ, सुर्खेतमा उपचारका क्रममा बिहान करिब १०:२५ बजे मृत्यु भएको प्रहरीले जनाएको छ।

घटनास्थलमा ट्राफिक प्रहरीसहित पाँच जनाको प्रहरी टोली खटिएको थियो। ईभी गाडी चालक वीरेन्द्रनगर नगरपालिका–७ बस्ने ४४ वर्षीय बालकृष्ण रिजालसहित दुवै सवारी साधन प्रहरीको नियन्त्रणमा रहेका छन्। दुर्घटनाका सम्बन्धी थप अनुसन्धान भइरहेकाे प्रहरीले जनाएकाे छ ।