स्वास्थ्यका लागि कति लाभदायक छ सुजी? जानौँ यसको फाइदा

काठमाडौं — गहुँबाट बनेको सुजी नेपाली भान्सामा नियमित रूपमा प्रयोग हुँदै आएको खाद्य पदार्थ हो। सजिलै उपलब्ध हुने सुजीलाई हलुवा, उपमा, तरकारीलगायत विभिन्न परिकारका रूपमा खाजामा समावेश गर्न सकिन्छ। स्वादिलो मात्र नभई सुजी पौष्टिक गुणले भरिपूर्ण भएकाले स्वास्थ्यका दृष्टिले पनि अत्यन्त लाभदायक मानिन्छ।

स्वास्थ्य विज्ञहरूका अनुसार सुजीमा शरीरलाई आवश्यक पर्ने विभिन्न पोषक तत्त्वहरू पाइन्छन्, जसले दैनिक जीवनमा सकारात्मक प्रभाव पार्छ। सुजीका प्रमुख फाइदाहरू यस्ता छन्—

उर्जाको राम्रो स्रोत
बिहानको समयमा सुजीको हलुवा वा उपमा सेवन गर्दा दिनभर शरीरमा ऊर्जा कायम रहन्छ। विशेषगरी तरकारीसँग सुजीको प्रयोग गर्दा यसको पोषण मूल्य अझ बढ्ने गर्छ।

मुटु स्वास्थ्यका लागि उपयोगी
सुजीको नियमित सेवनले मुटु स्वस्थ राख्न मद्दत गर्छ। यसले रक्तसञ्चारलाई सन्तुलित राख्दै मुटु सम्बन्धी रोग र हृदयघातको जोखिम कम गर्न सहयोग पुर्‍याउँछ।

पाचनतन्त्र मजबुत बनाउँछ
सुजीमा पाइने फाइबरले पाचन प्रणालीलाई सक्रिय र स्वस्थ राख्छ। साथै क्याल्सियम, सेलेनियम, म्याग्नेशियम, फस्फोरस र पोटासियमजस्ता खनिज तत्त्वले पाचनसम्बन्धी समस्या कम गर्न मद्दत गर्छन्।

रोग प्रतिरोधात्मक क्षमता वृद्धि
सुजीमा रहेको सेलेनियमले शरीरको रोग प्रतिरोधात्मक क्षमता बढाउने काम गर्छ। यसले विभिन्न प्रकारका संक्रमणबाट जोगाउन सहयोग पुर्‍याउँछ।

रक्तअल्पतामा फाइदाजनक
आइरनको पर्याप्त मात्रा पाइने भएकाले सुजीले शरीरमा रगतको कमी पूरा गर्न मद्दत गर्छ। यसले थकान कम गरी शरीरलाई शक्ति प्रदान गर्छ।

स्नायु र मांसपेशी बलियो बनाउँछ
फस्फोरस, जिंक र म्याग्नेशियमले स्नायु प्रणालीलाई मजबुत बनाउँछन्। साथै सुजीमा रहेको प्रोटिनले छाला र मांसपेशीलाई पनि स्वस्थ र बलियो राख्न सहयोग गर्छ।

डाइटका लागि उपयुक्त
थोरै मात्रामा सुजी सेवन गर्दा पनि पेट भरिएको महसुस हुने भएकाले अनावश्यक भोक कम हुन्छ। यसले तौल नियन्त्रणमा राख्न मद्दत गर्ने भएकाले डाइटमा रहेकाहरूका लागि पनि सुजी उपयुक्त मानिन्छ।

यसरी, दैनिक खानपानमा सुजीलाई सन्तुलित रूपमा समावेश गर्दा स्वास्थ्यलाई अनेकौँ फाइदा पुग्ने देखिन्छ।