बङ्गलादेशमा बीएनपी नेता मुसब्बिरको गोली हानी हत्या

ढाका – बङ्गलादेश नेसनलिस्ट पार्टी (बीएनपी) का नेता अजिजुर रहमान मुसब्बिरको गोली हानी हत्या गरिएको छ। सोही घटनामा कारवान बजार भ्यान एसोसिएसनका महासचिव अबु सुफियान मसूद गम्भीर घाइते भएका छन्।

स्थानीय सञ्चारमाध्यमका अनुसार मुसब्बिर बुधबार राति करिब ८ः४० बजे ढाकाको बसुन्धरा मार्केट पछाडिको बजार क्षेत्रमा अज्ञात बन्दुकधारीको आक्रमणमा परेका थिए। मुसब्बिर बीएनपीको स्वयंसेवक शाखा ढाका सिटी नर्थ स्वेच्छासेबक दलका पूर्व महासचिव हुन्।

तेजगाँव डिभिजनका अतिरिक्त प्रहरी उपायुक्त (एडीसी) फजलुल करिमले घटनाको पुष्टि गर्दै स्टार कबाब नजिकैको गल्लीमा अज्ञात समूहले दुई जनामाथि गोली चलाउँदा मुसब्बिरको मृत्यु भएको जानकारी दिए। घाइते अबु सुफियान मसूदलाई उपचारका लागि ढाका मेडिकल कलेज अस्पताल पठाइएको उनले बताए।

प्रहरीका अनुसार मोटरसाइकलमा आएका आक्रमणकारीहरूले फार्मगेट पार गरेपछि कारवान बजारस्थित स्टार कबाब अगाडि गोली चलाएका थिए। गम्भीर घाइते अवस्थामा मुसब्बिरलाई बीआरबी अस्पताल लैजाँदै गर्दा बाटोमै मृत्यु भएको जनाइएको छ।

द डेली स्टारका अनुसार मुसब्बिर शरियतपुरका बासिन्दाहरूको समूहसँग सुपर स्टार होटल नजिकै आयोजित कार्यक्रममा सहभागी भएका थिए। कार्यक्रमपछि मुसब्बिर र मसूद नजिकैको गल्ली हुँदै हिँडिरहेका बेला दुई जना आक्रमणकारीले उनीहरूमाथि गोली चलाएर फरार भएका थिए।

घटनापछि सोना र गाउँ चौराहा नजिक बीएनपी समर्थक तथा स्थानीय सदस्यहरू सम्मिलित समूहले विरोध प्रदर्शन गरेका थिए। पछिल्लो समय बङ्गलादेशभर राजनीतिक हिंसा बढ्दै गएको अवस्थामा फेब्रुअरी १२ मा हुने राष्ट्रिय निर्वाचनअघि यस घटनाले सुरक्षा र कानून–व्यवस्थाप्रति थप चिन्ता बढाएको छ।

प्रहरीले घटनामा संलग्न आक्रमणकारीको खोजी तीव्र बनाएको जनाएको छ।