यस्तो स्वास्थ्य समस्यामा फाइदाजनक हुन्छ गुड

काठमाडौं – गुड (चाकु) लाई पोषणयुक्त खाद्य पदार्थका रूपमा लिइन्छ । फाइबर, कार्बोहाइड्रेट, प्रोटिनका साथै क्याल्सियम, म्याग्नेसियम, जिंक र आइरनजस्ता महत्वपूर्ण खनिज तत्वहरू पाइने भएकाले यसलाई ‘सुपरफुड’ पनि मानिन्छ । विशेषगरी जाडो मौसममा गुडको सेवन स्वास्थ्यका लागि निकै लाभदायक हुने पोषणविद्हरू बताउँछन् ।

गुडले विभिन्न स्वास्थ्य समस्यामा सकारात्मक प्रभाव पार्ने विश्वास गरिएको छ। तीमध्ये केही प्रमुख फाइदाहरू यस प्रकार छन् :

हड्डी मजबुत बनाउन सहयोगी
गुडमा आइरन प्रशस्त मात्रामा पाइने भएकाले यसले हड्डी र मांसपेशीलाई बलियो बनाउने काम गर्छ । हड्डी कमजोर हुने समस्या भएका व्यक्तिका लागि गुडको सेवन उपयोगी मानिन्छ ।

एनीमिया नियन्त्रणमा मद्दत
आइरनको राम्रो स्रोत भएकाले गुडले रगतको कमी हुन नदिने काम गर्छ । एनीमिया (रक्तअल्पता)को समस्या भएका व्यक्तिले नियमित रूपमा गुडको सेवन गर्दा लाभ मिल्ने बताइन्छ ।

पाचन प्रणाली सुधार
जाडो मौसममा कब्जियतजस्ता पाचनसम्बन्धी समस्या बढी देखिने गर्छ । गुडमा रहेको फाइबरले पाचन प्रणालीलाई सक्रिय बनाइ कब्जियत कम गर्न सहयोग पुर्‍याउँछ ।

रुघाखोकीमा उपयोगी
जाडोमा हुने रुघाखोकी, घाँटी दुख्ने तथा पोल्ने समस्यामा गुडको पानी वा गुड मिसाएको चिया पिउनु फाइदाजनक मानिन्छ । यसले शरीरलाई न्यानो राख्नुका साथै खोकी कम गर्न मद्दत गर्छ ।

स्वास्थ्यका लागि फाइदाजनक मानिए पनि गुडको सेवन सन्तुलित मात्रामा गर्नुपर्ने विज्ञहरूको सुझाव छ । मधुमेहजस्ता समस्या भएका व्यक्तिले भने चिकित्सकको सल्लाह अनुसार मात्रै गुडको सेवन गर्न उपयुक्त हुन्छ ।