न्युजिल्यान्ड पठाइदिने भन्दै १० लाख ठगी गर्ने कटुवाल पक्राउ

काठमाडौँ । वैदेशिक रोजगारीका लागि न्युजिल्यान्ड पठाइदिने प्रलोभन देखाएर १० लाख रुपैयाँ ठगी गरेको अभियोगमा प्रहरीले एक जनालाई पक्राउ गरेको छ।

काठमाडौँ उपत्यका अपराध अनुसन्धान कार्यालयका प्रवक्ता एवं प्रहरी उपरीक्षक काजीकुमार आचार्यका अनुसार पक्राउ पर्नेमा सुनसरीको इनरुवा नगरपालिका–१ घर भई हाल काठमाडौँको कीर्तिपुर नगरपालिका–११ बस्ने ३८ वर्षीय विशाल कटुवाल रहेका छन्।

प्रहरीका अनुसार कटुवालले बेरोजगार युवायुवतीलाई आकर्षक तलबको आश्वासन दिँदै न्युजिल्यान्ड लैजाने भन्दै रकम असुलेर पछि सम्पर्कविहीन भएका थिए। पीडितको उजुरीका आधारमा अनुसन्धान अघि बढाउँदै कीर्तिपुरबाट उनलाई पक्राउ गरिएको हो।

पक्राउ परेका कटुवाललाई थप अनुसन्धान तथा आवश्यक कारबाहीका लागि आजै वैदेशिक रोजगार विभाग, ताहाचल पठाइएको प्रहरीले जनाएको छ।