पूर्व गृहमन्त्री लेखक आज जाँचबुझ आयोगमा बयान दिन जाँदै

काठमाडौँ । पूर्व गृहमन्त्री रमेश लेखक भदौ २३ र २४ गते भएका घटनासम्बन्धी जाँचबुझ आयोगमा आज बयान दिन उपस्थित हुने भएका छन् । भदौ २३ गते भएको आन्दोलनका क्रममा विद्यार्थीहरूमाथि बल प्रयोग गरिएको विषयमा आयोगले उनीसँग सोधपुछ गर्न लागेको हो ।

आन्दोलनको घटनाबारे छानबिनका लागि गठित आयोगले पूर्व गृहमन्त्री लेखकलाई पुस १३ गते नै उपस्थित हुन पत्राचार गरेको थियो । सोही अनुरूप उनी आज दिउँसो १२ बजे आयोगको कार्यालयमा बयान दिन जाने तयारीमा रहेका छन् ।

जेन–जेड आन्दोलन चर्किएको समयमा लेखक गृहमन्त्रीको जिम्मेवारीमा रहेका थिए । त्यसबेला भएका गतिविधि, सुरक्षा निकायको भूमिका र निर्णय प्रक्रियाबारे आयोगले स्पष्टिकरण लिने बताइएको छ ।

आयोगले यसअघि पनि घटनासँग सम्बन्धित विभिन्न व्यक्ति तथा निकायका प्रतिनिधिसँग बयान लिँदै आएको छ । विद्यार्थीमाथि भएको बल प्रयोगको सत्यतथ्य पत्ता लगाई जिम्मेवार पक्ष पहिचान गर्ने उद्देश्यसहित छानबिनलाई तीव्रता दिइएको आयोगको भनाइ छ ।