एसीसी यू–१९ एशिया कप आजदेखि यूएईमा सुरु, नेपाल भोलि श्रीलङ्कासँग भिड्दै

काठमाडौँ – एसीसी १९ वर्षमुनिको एशिया कप क्रिकेट आजदेखि संयुक्त अरब इमिरेट्स (यूएई)मा सुरु भएको छ। उद्घाटन दिनमा भारतले आयोजक यूएईसँग तथा पाकिस्तानले मलेसियासँग खेल्दैछन्।

प्रतियोगिताका लागि नेपाली यू–१९ टोली यूएई पुगिसकेको छ। नेपालले आफ्नो पहिलो खेल भोलि श्रीलङ्काविरुद्ध सेभेन्स रङ्गशालामा खेल्नेछ। दोस्रो खेल मङ्सिर २९ गते बङ्गलादेशसँग तथा तेस्रो खेल पुस २ गते अफगानिस्तानसँग हुनेछ।

एशिया कपमा कुल आठ टोली सहभागी छन्। समूह ‘ए’मा भारत, पाकिस्तान, यूएई र मलेसिया परेको छ भने समूह ‘बी’मा बङ्गलादेश, श्रीलङ्का, अफगानिस्तान र नेपाल छन्। दुवै समूहबाट शीर्ष दुई टोली सेमिफाइनलमा प्रवेश गर्नेछन्। फाइनल खेल पुस ६ गते निर्धारित छ।

नेपाली टोलीमा कप्तान अशोक धामीसहित नीरजकुमार यादव, दिलशाद अली, अभिषेक तिवारी, सिव्रिन श्रेष्ठ, साहिल पटेल, दयानन्द मण्डल, निश्चल छेत्री, आसिश लोहार, नितेस पटेल, चन्दन राम, रोशन विक, विपिन शर्मा, वंश क्षेत्री र युवराज खत्री समावेश छन्।