यस्ता छन् दैनिक काजु खानुका फाइदै फाइदा

काठमाडौँ – पोषणले भरिपूर्ण काजु सबै उमेरका मानिसका लागि उपयोगी खाद्यवस्तु मानिन्छ। थोरै मात्रा सेवन गरे पनि शरीरलाई आवश्यक धेरै पोषण तत्त्व प्राप्त हुने भएकाले यसको लोकप्रियता बढ्दै गएको छ। काजुमा म्याग्नेसियम, तामा, फलाम, पोटासियमलगायत खनिज प्रशस्त मात्रामा पाइन्छ, जसले शरीरलाई स्वस्थ राख्न महत्वपूर्ण भूमिका खेल्छ।
स्वास्थ्य विशेषज्ञका अनुसार दैनिक दुई–तीनवटा काजु खानुले शरीरमा ऊर्जा थपिने, थकान हट्ने र स्फूर्ति आउने गर्छ। काजु प्रोटिनको राम्रो स्रोत भएकाले नियमित सेवनले अनुहार चम्किलो बनाउने, छालाको गुणस्तर सुधार गर्ने तथा दिमागलाई तेज बनाउन सहयोग गर्छ।
युरिक एसिडका समस्या भएकाहरूले अधिकांश ‘ड्राइफुड’ खान नहुने भए पनि काजु भने सुरक्षित मानिन्छ, किनकि यसले शरीरमा युरिक एसिड बढाउन मद्दत गर्दैन। साथै, कम सोडियम र उच्च पोटासियमका कारण काजु रक्तचाप नियन्त्रणमा पनि उपयोगी हुने विशेषज्ञहरूको भनाइ छ।
काजुमा पाइने तत्वले हड्डी तथा दाँत मजबुत बनाउने, कोलेस्टेरोल सन्तुलनमा राख्ने र शरीरका विभिन्न प्रणालीलाई सक्रिय राख्ने बताइन्छ। तर काँचो काजु भने विषालु ‘उरुसिओल’ भएको कारण खान नहुने चेतावनी विशेषज्ञहरूले दिएका छन्।
नियमित काजु सेवनका फाइदाहरू

दाँत तथा हड्डी बलियो बनाउने

कपाल चम्किलो बनाउने

आँखाको स्वास्थ्य सुधार गर्ने

गर्भवती महिलाका लागि लाभदायक

कब्जियत कम गर्ने

शरीर स्फूर्त राख्ने

कमजोरी हटाउने

अनुहारमा चमक ल्याउने

मुटुको स्वास्थ्य मजबुत बनाउने

दिमागलाई सक्रिय बनाउने

स्वास्थ्यका यस्ता धेरै फाइदाका कारण काजु आजकल धेरैको दैनिक आहारमा समावेश हुन थालेको छ।