रेडक्रसको एम्बुलेन्स गाँजा ओसारपसारमा प्रयोग

सर्लाही– बिरामी बोक्ने उद्देश्यले प्रयोग गरिने एम्बुलेन्समै गाँजा ओसारपसार भइरहेको तथ्य सर्लाहीमा पक्राउ परेका एक एम्बुलेन्ससहित सार्वजनिक भएको छ। प्रहरीको विशेष सूचना आधारमा नियन्त्रणमा लिइएको एम्बुलेन्सबाट ठूलो परिमाणको गाँजा बरामद भएको हो।

हरिवन नगरपालिका–५, घुर्कौलीस्थित हिरालाल टोलबाट ज १ च १५५८ नम्बरको एम्बुलेन्स नियन्त्रणमा लिएपछि प्रहरीले पछाडिको भागमा बोरामा लुकाइराखिएको ५१ किलो ५ सय ग्राम गाँजा फेला पारेको सर्लाही प्रहरीले जनाएको छ। बरामद गरिएको एम्बुलेन्स नेपाल रेडक्रस सोसाइटी रामनगर बहुअर्वाको नाममा दर्ता भएको हो।

गाँजा ओसारपसारमा संलग्न रहेको आरोपमा एम्बुलेन्स चालक रौतहटको यमुनामाई गाउँपालिका–४, सरुअठाका ३७ वर्षीय सुरेन्द्र राय यादवलाई प्रहरीले पक्राउ गरेको छ। घटनाबारे थप अनुसन्धान भइरहेको प्रहरी उपरीक्षक योगेन्द्रकुमार खड्काले बताए।

यसअघि पनि सर्लाहीमा गाँजा तस्करीका घटनाहरू दोहोरिएको जनाइएको छ। शुक्रबार मात्रै लालबन्दी नगरपालिका–११, हीरापुरबाट ५२ किलो गाँजासहित एकजनालाई पिकअप भ्यानसहित प्रहरीले नियन्त्रणमा लिएको थियो।

जिल्लाको चुरे क्षेत्रमा व्यावसायिक रूपमा गाँजा खेती भइरहेको र त्यहाँ उत्पादन भएको गाँजा भारततर्फ पठाइने गरिएको प्रहरीले जनाएको छ।