भारतीय फास्ट बलर हर्षित रानालाई आईसीसीले गर्‍यो कारबाही

काठमाडौं — अन्तर्राष्ट्रिय क्रिकेट परिषद (आईसीसी) ले भारतीय क्रिकेट टिमका तीव्र गतिका बलर हर्षित रानामाथि अनुशासनात्मक कारबाही गरेको छ। दक्षिण अफ्रिका विरुद्धको पहिलो एकदिवसीय खेलमा आईसीसी आचारसंहिताको धारा २.५ उल्लङ्घन भएको ठहर भएपछि उनलाई दोषी ठहर गरिएको हो।

उक्त धारा विपक्षी खेलाडीलाई आउट गरेपछि गरिने अपमानजनक, उत्तेजनात्मक वा असभ्य व्यवहारसँग सम्बन्धित हुन्छ। घटना दक्षिण अफ्रिकी पारीको २२औँ ओभरमा भयो, जब रानाले ब्याट्सम्यान डेवाल्ड ब्रेभिसलाई आउट गरेपछि ड्रेसिङ रुमतर्फ उत्तेजक इशारा गरेका थिए।

आईसीसीले रानाको अनुशासनात्मक रेकर्डमा एक डिमेरिट अंक थपेको छ। उनले आफ्नो गल्ती स्वीकार गरेका छन् र म्याच रेफ्री रिची रिचर्डसनले तय गरेको सजाय मान्ने सहमति जनाएका छन्।