जागिरबाट निकालेको रिसले सहकर्मीबाटै व्यवस्थापकको हत्या

बारा — बाराको प्रसौनी गाउँपालिका–६ भलुहीस्थित किरण वेभरेज नेपाल प्रालिमा पानी उद्योगका व्यवस्थापक राम किशोर सिंहको हत्या उनकै सहकर्मीले गरेको प्रहरीले जनाएकाे छ। घटना भएको दुई दिनपछि जिल्ला प्रहरी कार्यालय बाराले आइतबार विज्ञप्ति जारी गर्दै वीरगञ्ज–२२ का २१ वर्षिय राजन कुमार राम र २१ वर्षिय प्रमोद साह तुरहाले हत्या गरेको निष्कर्ष अनुसन्धानबाट आएको जनाएको हो।

प्रहरीका अनुसार कामबाट बारम्बार हुने विवाद र अन्तिम पटक निकालेको रिसकै कारण दुवैले मिलेमतोमा हत्या गरेका थिए। घटना भएको साँझ राम किशोर, राजन र प्रमोद सँगै बसेर मदिरा सेवन गरेका थिए। त्यही क्रममा पुगेको विवादले हिंसात्मक रूप लिएपछि दुवैले राम किशोरको हत्या गरेको स्वीकृति दिएका छन्।

प्रमोद उद्योगमा चालकका रूपमा कार्यरत थिए। गत वर्ष गढीमाई मेलाका बेला गाडीको क्लच प्लेट बिग्रिएपछि राम किशोर र राजनबीच झगडा भएको र त्यसपछि राजनले काम छाडेको प्रहरीले जनाएको छ। पछि पुनः काममा फर्किएका राजनले कम्पनीले तोकेको ११० रुपैयाँको पानी बजारमा ११५–१२० रुपैयाँमा बेच्दै व्यक्तिगत लाभ लिँदै आएको कुरा थाहा पाएपछि व्यवस्थापकसँग पुनः विवाद चर्किएको थियो। यही विवादका कारण राजनलाई फेरि कामबाट हटाइएको थियो।

त्यसपछि दुवैले मिलेर हत्याको योजना बनाएको प्रहरीको दाबी छ। घटना भएकाे दिन नै आरोपी दुईजनालाई प्रहरीले पक्राउ गरेको थियो। उनीहरूविरुद्ध कर्तव्य ज्यान मुद्दामा बारा जिल्ला अदालतबाट सात दिनको म्याद लिएर थप अनुसन्धान अघि बढाइएको प्रहरीले जनाएको छ।