रोमानियाको सडक दुर्घटनामा सर्लाहीका २५ वर्षीय सलिनको मृत्यु

सर्लाही – रोजगारीका लागि युरोप पुगेका सर्लाहीका २५ वर्षीय सलिन आले मगरको रोमानियामा सडक दुर्घटनामा मृत्यु भएको छ। ईश्वरपुर नगरपालिका–६ का निवासी सलिन करिब १० महिनाअघि रोजगारका लागि रोमानियाको राजधानी बुखारेस्ट पुगेका थिए र त्यहाँको ‘पान फास्टफुड’मा कार्यरत थिए।

शुक्रबार साँझ बुखारेस्टको काला जिउलेस्ती क्षेत्रमा सडक पार गर्ने क्रममा विपरीत दिशाबाट उच्च गतिमा आएको कारले ठक्कर दिँदा उनको घटनास्थलमै मृत्यु भएको रोमानियाली प्रहरी प्रशासनलाई उद्धृत गर्दै स्रोतले जनाएको छ। दुर्घटनाग्रस्त कार १८ वर्षीय स्थानीय युवकले चलाइरहेको विवरणमा उल्लेख गरिएको छ।

दुर्घटनापछि सलिनको शव बुखारेस्टस्थित कलिनिका दे अर्जेन्ट अस्पतालको शवगृहमा राखिएको छ। आवश्यक कानुनी प्रक्रिया पूरा गर्दै उनको शव नेपाल पठाउने तयारी भइरहेको र घटनाबारे परिवारलाई औपचारिक जानकारी गराइएको परिवार स्रोतले जनाएको छ।

स्थानीय प्रशासनले दुर्घटनाबारे थप अनुसन्धान अघि बढाएको छ।

Is this conversation help