सुर्खेतको काक्रेबिहार जंगलमा दुई युवायुवती मृत फेला

सुर्खेत । सुर्खेतको वीरेन्द्रनगर नगरपालिका वडा नम्बर ९ स्थित काक्रेबिहार जंगलमा दुई युवायुवती झुण्डिएको अवस्थामा मृत फेला परेका छन्। साेमबार बिहान करिब ११ बजेर २० मिनेटमा घाँस काट्न जंगल गएका स्थानीय बासिन्दाले करौतीको रुखमा सलको पासो लगाई झुण्डिएको अवस्थामा शव देखेपछि प्रहरीलाई खबर गरेका थिए।

घटनाको जानकारी प्राप्त भएलगत्तै जिल्ला प्रहरी कार्यालय सुर्खेतबाट प्रहरी निरीक्षक राजन भट्टराईको कमाण्डमा पाँच जनाको प्रहरी टोली थप अनुसन्धानका लागि घटनास्थलतर्फ खटिएको प्रहरीले जनाएकाे छ।

जिल्ला प्रहरी कार्यालय सुर्खेतका अनुसार झुण्डिएर आत्महत्या गर्ने सुर्खेतको वीरेन्द्रनगर नगरपालिका वडा नम्बर १० खजुरा बस्ने दिल चौधरीकी छोरी १६ वर्षीया दीपिका चौधरी रहेको र जुम्लाको कनका सुन्दरी गाउँपालिका वडा नम्बर ७ बस्ने राजबहादुर खत्रीका छोरा १८ वर्षीय नरेश खत्री रहेका छन । प्रहरीका अनुसार युवतीका काका राजु चौधरी र युवककी फुपु गीता खत्रीले सनाखत गरेका छन्।

घटनाबारे थप अनुसन्धान भइरहेको जिल्ला प्रहरी कार्यालय सुर्खेतले जनाएको छ।